Better Tomorrow

ဖိတ်ကြားလွှာ

2009-08-26T00:29:00.000+07:00

လာရောက် လည်ပတ်သူမိတ်ဆွေ များကို မင်္ဂလာပါ လို့နှုတ်ခွန်းဆက်ပါတယ်။ ကျွန်တော် အခုလက်ရှိ blog spot ကနေပြီး mmbettertomorrow.com ကိုပြောင်းလည်း ရေးမှာဖြစ်တဲ့ အတွက် mmbettertomorrow.com သို့လည်း လာရောက်လည်ပတ်ပေးဖို့ ဖိတ်ခေါ်အပ်ပါတယ်ခင်ဗျာ။ ကျွန်တော် ထိုင်းနိုင်ငံရောက် ရွှေ့ ပြောင်း မြန်မာလုပ်သားများရဲ့ ဘ၀ တစိတ်တဒေသကို ဆက်လက်တင်ပြပေး သွားပါ့ မယ်။ ကျေးဇူးတင်ပါတယ်။

နမိုးနီးယား ပုလိပ်ရောဂါ

2009-08-05T06:14:00.000+07:00

သတင်းလိုက်ဖတ်နေရင်း A-H1N1 update လေးသိခြင်လို့ ဘန်ကောက်ပို့ကို ကလစ်မိတယ်။ ကျန်းမာရေး လုပ်သားမို့ ကျန်းမာရေးစာမျက်နှာပေါ့။ တွေ့လိုက်ရတဲ့ သတင်းက လူကို အိပ်ချင်စိတ်ပျောက် သွားစေ တယ်။ တရုတ်နိုင်ငံမှာ ပုလိပ်ရောဂါပိုးကြောင့် လူသုံးဦး သေဆုံးတဲ့သတင်းပါ။ ထိုင်း ပြည်သူ့ကျန်းမာရေး ၀န်ကြီးဌာနကလည်း သူ့ပြည်တွင်းမှာ ရှိတဲ့လေယဉ်ကွင်းများနဲ့ နယ်စပ်ဒေသ ၀င်ပေါက်ထွက်ပေါက် ၆၄ ခုကို တပ်လှန့်ထားပါတယ်။

“နမိုးနီးယား ပုလိပ်ရောဂါပိုး”
ပုလိပ်ရောဂါလို့ပြောရင် ကျွန်တော်တို့ မြန်မာလူမျိုးတွေအတွက် တော့သိပြီးရင်းနှီး ကျွမ်းဝင်ပြီးသားလို့ ထင်ပါတယ်။ ရောဂါပိုးရှိနေတဲ့ တိရိစ္ဆာန်များ ကနေတဆင့်လူကိုကူးစက်ပျံ့ နှံ့တာပါ။ Yersinia pestis လို့ခေါ်တဲ့ ဘက်တီးရီးယားရောဂါပိုးတစ်မျိုးကြောင့် ဖြစ်ရတာပါ။ Y.pestis ဘက်တီးရီးယား ရောဂါပိုးမွှား များဟာ ကမ္ဘာ့နေရာအနှံ့အပြားမှာ ရှိနေတတ်ပါတယ်။
Y.pestis ဘက်တီးရီးယားပိုးဟာ နေအလင်းရောင်နဲ့ အပူမှာပျက်စီးသေဆုံးနိုင်တယ်ဆိုပေမယ့်၊ လေထဲမှာ ပျံ့ နှံ့နေချိန်မှာ တစ်နာရီထက် အထက် အသက်ရှင်ရပ်တည်နေနိုင်ပါတယ်။
ကူးစက်ပျံ့ နှံ့ခြင်း
နမိုးနီးယား ပုလိပ်ရောဂါပိုးဟာ ဆိုးရွားပြင်းထန်တဲ့ ပုလိပ်ရောဂါပိုး တစ်မျိုးဖြစ်ပါတယ်။ Y.pestis ဘက်တီးရီးယားပိုး လူ့ခန္စာကိုယ် အဆုပ်ထဲကို ၀င်ရောက်ကူးစက်ခြင်းကြောင့် ပြင်းထန်ဆိုးရွားပြင်းထန်တဲ့ နမိုးနီးယား ပုလိပ်ရောဂါဖြစ်လာရတာပါ။ ဒီအချိန်မှာ လူတစ်ဦးမှတစ်ဦးကို လေမှတဆင့် ကူးစက်ပျံ့ နှံ့ နိုင် ပါ တယ်။ ရောဂါဖြစ်ပွားနေသူ တစ်ဦးတစ်ယောက် အသက်ရှုသွင်း ရှုထုတ် ပြုလုပ်တဲ့ အချိန်မှာ ရောဂါပိုးမွှားလေးတွေဟာ လေထဲမှာ ကျန်နေခဲ့ပြီး အခြားတစ်ဦးရှုမိသွားရင်ကူးစက်ပျံ့ နှံ့ခြင်းကို ခံရမှာဖြစ် ပါတယ်။ နမိုးနီးယား ပုလိပ်ရောဂါပိုး ကူးစက်ခြင်းကို ခံရသူဟာ ရောဂါပိုးရှိသောသူ (သို့) တိရိစ္ဆာန်များနှင့် နီးကပ်စွာရှိပြီး တိုက်ရိုက်ရှုမိခြင်း၊ ထိတွေ့မိခြင်းကြောင့်အများကူးစက်မှုဖြစ်နိုင်ပါတယ်။ Bubonic ပုလိပ်နှင့် Septicemic ပုလိပ်ရောဂါပိုး ကူးစက်ခံထားရပြီး မကုခြင်း၊ မသိခြင်းတို့ကြောင့်လည်း ရောဂါပိုး အဆုပ်အတွင်းသို့ ပျံ့ နှံ့ပြီး နမိုးနီးယား ပုလိပ်ရောဂါပိုးကို ခံစားရနိုင်ပါတယ်။ (ကလစ်ပြီး ကြည့်ရန်)

ရောဂါလက္ခာ
ပထမပိုင်း (သို့) အစောပိုင်းလက္ခာများ အနေ နှင့်
• ဖျားခြင်း၊ ကိုယ်ပူခြင်း
• ခေါင်းကိုက်ခြင်း
• မောပန်းနွမ်းနွယ်ခြင်း
အဆုပ်ရောင်သော လက္ခာများ လျှင်မြန်စွာ ဖြစ် ပေါ်လာ ခြင်းနှင့်အတူ
• အသက်ရူတိုတောင်းလာခြင်း၊ မြန် လာခြင်း၊ ခက်လာခြင်း၊ ကြပ်လာခြင်း
• ချောင်းဆိုးခြင်း၊ ပျို့ ခြင်း၊ အန်ခြင်း
• ရင်ဘတ်နာခြင်း
• ချောင်းဆိုးလျှင် သွေး (သို့) သလိပ် အရည်များ ပါလာခြင်း တို့ဖြစ်သည်။ နမိုးနီးယား ပုလိပ်ရောဂါပိုးသည် ၂ ရက်မှ ၄ရက်အတွင်း လူ၏ခန္ဓာကိုယ်အတွင်းတွင် ပျံ့ ပွားကူးစက်သည်။ လျှင်မြန်စွာ ဆေးဝါးကုသမှု မခံယူ လျင် အသက်ရူလုပ်ငန်းစဉ်များ ပျက်စီးခြင်း နှင့်သတိလစ်ခြင်းတို့ဖြင့် လူနာသေဆုံးနိုင်သည်။
ကာကွယ်ကုသခြင်း
တစ်ကိုယ်ရည်သန့်ရှင်းရေးနှင့် ပတ်ဝန်းကျင်သန့်ရှင်းရေးကို အထူးဂရုပြု၍ ဆောင်ရွက်ရမည်။ မိမိအိမ်မွေးတိရိစ္ဆာန်များ ကိုစနစ်တကျမွေးမြူကိုင်တွယ်ပါ။ ခွေးနှင့်ကြောင်တို့ တွင် လှေးများမရှိအောင် တပတ်တခါခန့် သန့်ရှင်းရေးပြုလုပ်ပေးရမည်။ အစာခွက်များကို သန့်ရှင်းအောင်ထားပေး ရမည်။ တိရိစ္ဆာန်များ နေထိုင်မကောင်းဖျားနေလျှင် (သို့) သေနေလျှင် လက်ဖြင့်တိုက်ရိုက်မကိုင်ရ။ အိမ်ပတ်ဝန်းကျင်တွင် အစားအစာများ ကို စနစ်တကျစွန့်ပစ်ရမည်။ အစားအစာများကို သေချာအောင်ဖုံး အုပ်ထား ရမည်။ အင်းဆက်ပိုးသတ်ဆေး များကို အိမ်တွင်း အိမ်ပြင် ဂရုတစ်စိုက် ပက်ဖျန်းပေးရမည်။
- ချောင်းဆိုး၊ နှာချေပါက ပါးစပ်နှင့် နှာခေါင်းကို ဖုံးအုပ်ပါ၊ တစ်ရှုးစက္ကူသုံးပါက သေချာစွာစွန့်ပစ်ပါ၊ ပြီးလျင် လက်ကို ဆပ်ပြာသုံး၍ ရေဖြင့် စင်ကြယ်စွာဆေးကြောပါ (သို့မဟုတ်) အရက်ပျံပါသည့် လက်ဆေးရည်ဖြင့် ဆေးကြောပါ။

- ချောင်းဆိုး၊ နှာချေသည့်အခါ ပါးစပ်နှင့် နှာခေါင်းကို ဖုံးအုပ်စရာ အနီးအနားတွင် မရှိပါက ပါးစပ်နှင့် နှာခေါင်းကို လက်မောင်းဖြင့်အပ်ပြီး တတ်နိုင်သမျှ ဖုံးအုပ်ပါ။ လက်နှင့်တိုက်ရိုက်မထိစေရန် ရှောင်ကြဉ်ရ မည်။
- လူအများရှိရာသို့သွားလျင် မျက်နှာဖုံး(Mask) မှန်ကန်စွာ တပ်ဆင်အသုံးပြုပါ။
နမိုးနီးယား ပုလိပ်ရောဂါပိုးကို ပိုးသတ်ဆေးများဖြင့် ၂၄ အတွင်းလျှင်မြန်စွာ ကုသပေးရမည်။ အကယ်၍ကုသမှု မပြုလုပ်ပါက ၂၄ နာရီအတွင်းပင်လူနာသေဆုံးနိုင်သည်။ ကာကွယ်ရန်အတွက် ကာကွယ် ဆေးမရှိသေးပါ။
Reference
WiKi
CDC
Bang Kok Post
Mayo Clinic

ကားလမ်းချော်ပြီး သစ်ပင်ဖြင့် တိုက်မိ

2009-08-05T00:55:00.004+07:00

ဒီနေ့ အလုပ်လုပ်ကိုင်ခွင့် လက်မှတ် ပြုလုပ်တဲ့ ရွှေ့  ပြောင်း မြန်မာ အလုပ်သမားတွေကို ဆေးရုံဘတ် လုပ်ပေးတယ်။ အဲဒီနေရာမှာ အလုပ်သမား တွေ တန်းစီ နေ လိုက်တာ လူ ၇၀၀ လောက်ရှိတယ်။ နောက်ထပ် လူတွေလည်း လာနေတုန်းပါပဲ။ ကျွန်တော့် လူနာတွေ လည်း ဘတ်လုပ်တဲ့ အထဲပါနေလို့ မကျန်ခဲ့ရအောင် လိုက်စီစဉ်ပေးနေရတယ်။
မနက် (၁၀) နာရီ ၀န်းကျင်မှာ ဆေးစစ်ခံဖို့လာတဲ့ ကားတစ်စီး ကားလမ်းချော်ပြီး သစ်ပင်ကို သွားတိုက်မိလို့ ကားပေါ်မှာ ပါလာတဲ့ အလုပ်သမားတွေ တကောပါ ဆေးရုံ ကြီးကို တင်ပို့နေရတယ် ကြားလို့ ဆေးရုံကို သွားရောက်ခဲ့ရပါတယ်။ ဆေးရုံမှာ အခြားကိစ္စနဲ့ ကြိုရောက် နေပြီးဖြစ်တဲ့ ကျန်းမာရေး ၀န်ထမ်းတစ်ဦးကို လိုအပ်တာတွေ ကူညီဖို့ လှမ်းပြောထားရတယ်။ ခဏအကြာမှာ သူအသံတွေ တုန်ပြီး မြန်မြန်လာခဲ့ဖို့ ဖုန်းပြန်ဆက်လာတယ်။ တစ်ချို့ လူနာတွေ အခြေအနေသိပ်မကောင်း ကြောင်း ဖူးကတ်ကို လွဲဖို့ လုပ်နေပြီ ဆိုတာလည်း ပြောပြတယ်။ ကျွန်တော်တို့ ဆေးရုံကို သွားနေချိန်လမ်းမှာပဲ အရေးပေါ်ကား နှစ်စီးဖူးကတ် ဘက်ကို အသံပေးပြီး မောင်းသွားတာ တွေ့လိုက်တယ်။
ဆေးရုံအရှေ့  အရောက်မှာပဲ တော်တော်လေးပျက်စီးသွားတဲ့ ကားကို အခြားကားတစ်စီးဆွဲသွားတာထပ်တွေ့ လိုက်ရတယ်။ ပျက်စီးသွားတဲ့ ကားအခြေအနေကို တွေ့မှပဲ ပိုလို့စိုးရိမ်မိသွားတယ်။ ဆေးရုံဝန်းထဲကို ရောက်တော့ အရေးပေါ်လူနာတင်ကား ၅ စီးရပ်ထားတယ်။ လူတွေလည်း ထိပ်ထိပ်ပြာပြာ ဖြစ်နေ တယ်။ အရေးပေါ်ကုသဆောင်ရဲ့ ကုတင်ထက်ပေါ်မှာ လူနာတွေ လေးငါးယောက် ဆေးပိုက်တန်းလန်းနဲ့ သတိမေ့ သူကမေ့ အော်သူကအော်နဲ့ ကုတင်ဘေးနဲ့ ကုတင်အောက်တွေမှာ သွေးစွန်းတဲ့ အ၀တ်အစားတွေပုံ လျှက်တွေ့ရတယ်။ လူလည်း အခိုက်အတန့်တော့ တော်တော်လေးပြာသွားတယ်။ အခြေအနေ အေးဆေးလို့ အဖြစ်အပျက်ကို ပြန်စီစစ်တော့ ကားပေါ်မှာ ပါလာသူ အားလုံးက ထိုင်းကားမောင်းဆရာ (မိန်းမလိုနေသူ) အပါအ၀င် ၁၉ကိုးရှိတယ်။ ဆေးကုသဖို့ မလိုသူက ကားဆရာအပါအ၀င် ၅ဦး ပြင်ပလူနာဌာနမှာက ၄ ဦး အတွင်းလူနာဆောင်မှာ ၁၀ဦးရှိတယ်။ အသက် (၂) အရွယ်ကလေးတစ်ယောက်နဲ့ အသက် (၁၆) နှစ်အရွယ် ကလေးကိုတော့ လုံးဝသတိမရသေးတဲ့ အခြေအနေကြောင့်ဖူးကတ်ဆေးရုံကြီးကို ထပ်ဆင့်ပို့ရတယ်။ တကောပါဆေးရုံမှာ ကျန်ခဲ့တဲ့ လူနာ (၈)ဦးထဲက အမျိုးသမီး (၅)ဦးနဲ့ အမျိုးသား (၃)ဦးတို့ ကိုတော့ အတွင်းလူနာ ကုဆောင်မှာ တင်ထားရတယ်။ အတွင်းလူနာဆောင်က လူနာတွေအားလုံး ဦးခေါင်းမှာ ထိခိုက်ဒဏ်ရာ ရကြတယ်။ အမျိုးသားနှစ်ဦးမှာ လက်ကျိုးတဲ့အတွက် ကြပ်စည်းထားရတယ်။ လူနာအားလုံး အရေးပေါ်ခွဲစိပ်ခန်းဝင်ဖို့ ပြင်ဆင်တဲ့ အနေနဲ့ အစာမစားရဆိုတဲ့ ဆိုင်းဘုတ်လေးတွေ ကုတင်(၈) ခုလုံးမှာ တွေ့ရတယ်။

နို့ဗူးလေးစို့လို့လသားအရွယ်ကလေးလေး တစ်ယောက် ကို ချီပြီးသွားနေတာ တွေ့လို့ မေးကြည့် တော့ ကလေး ရဲ့ မိဘနှစ်ပါးလုံး ကားတိမ်းစောင်းမှုမှာ ပါတယ်တဲ့။ စိုးရိမ် လို့ လိုက်စုံစမ်းကြည့်တော့ ဖခင်က ဗယ်ဘက် လက်မှာ အနည်းငယ်ထိခိုက်မိတယ်ဆို ပေမယ့်၊ နို့တိုက် မိခင်က သတိရတစ်ချက်မရ တစ်ချက်ဖြစ်နေ တယ်။ ကလေးကို တိုက်နေတဲ့ နို့ကိုမေးကြည့်တော့ နို့ဆီကို ဖျော်တိုက် တယ်တဲ့။ ကလေးကို သနားလို့ dumex နို့ဗူးတစ်ဗူးနဲ့ အခြားအသုံးအဆောင်ပစ္စည်း နည်းနည်း ၀ယ်ပေးခဲ့ ပြီးရုံးကိုပြန်ခဲ့တယ်။
ညပိုင်းအိမ်ပြန်ရောက်လို့ အိပ်ယာဝင်ခါနီးမှာ ကလေးလေးရဲ့ အမေ အခြေအနေသိခြင်တာ ကြောင့်ဖုန်းထပ် ဆက်ပြီး မေးကြည့်တယ်။ ကလေးအမေက သတိကောင်းကောင်းမရသေးဘူး ယောင်ယောင်ပြီး ထပြေးနေလို့ ခြေလက်တွေကို ကုတင်တိုင်နဲ့ တုတ်ထားရတယ်ဆိုတဲ့အကြောင်း၊ ညနေပိုင်းမှာ မဆန်းလို့ခေါ်လို့ ၁၆ နှစ်အရွယ် မိန်းကလေးတစ်ဦး သတိမရသေးတာကြောင့် ဖူးကတ်ဆေးရုံကြီးကို ထပ်မံလွှဲပြောင်းပေး ရတယ် လို့ထပ်မံသိရပါတယ်။ ဖူးကတ်ဆေးရုံမှာ ရှိတဲ့ လူနာစောင့်ကိုဖုန်းဆက်ပြီး မေးကြည့်တော့ (၂) နှစ်သားအရွယ် ကလေးနဲ့ ညနေပိုင်းကမှ လွဲပေးလိုက်တဲ့ မဆန်းက ကောင်းမွန်စွာ သတိရနေပြီလို့ ဖခင်ဖြစ်သူက ပြန်ဖြေပါတယ်။ အသက် (၁၆)နှစ် အရွယ် အောင်မင်းထိုက် ကိုတော့ ဆရာဝန်များက လက်လျော့ထားလိုက်ပြီဖြစ်တယ်လို့သိရပါတယ်။ ကားတိမ်းစောင်းမှုမှာ ပါတဲ့ သူ့မိခင်ကတော့ ဆေးရုံပေါ်မှာ သူ့သားအကြောင်း ကိုသိရတော့ တော်တော်လေးကိုစိတ်ထိခိုက်ပြီး စကားမပြောနိုင်ဖြစ်နေပါတယ်။ လူနာ တွေပြန်လည် ကျန်းမာဖို့ ကျွန်တော်တို့ဝိုင်းဝန်းဆုတောင်း ပေးကြရအောင်လားဗျာ။
သတင်း

ဒေါ်အောင်ဆန်းစုကြည်အား ခုံရုံးတင်စစ်ဆေးခြင်းနှင့် စပ်လျှင်း၍ ပြည်တွင်းပြည်ပ အဖွဲ့အစည်းများ စုပေါင်း ကြေငြာချက် (၃/၂၀၀၉)

2009-05-17T14:41:00.002+07:00

Gab Burma (Dassk)

Publish at Scribd or explore others: Fan Fiction Creative Writing Gab

ဘတ် ၂၀ နဲ့ လဲရတဲ့ ဘ၀

2009-05-09T02:16:00.004+07:00

ဆေးရုံက ဆင်းမယ့် လူနာတစ်ယောက်ကို သွားကြို ပေးရတယ်။ သစ်ပင်ပေါ် အသီးတက်ခူးစားရာ ကနေ လက်အံ့သေပြီး ပြုတ်ကျတာပါ။ ခါးနဲ့ ပြုတ်ကြတာဖြစ်တဲ့ အတွက် အခုဆိုရင် ခြေထောက်နှစ်ဖက်စလုံး လှုပ်မရ တော့တဲ့ အနေအထားရှိနေပါတယ်။ အချိန်အကြာကြီး ပေးပြီး ကုသရမှာပါ။ ဆေးဝါးကုသစားရိပ် လည်းများပါ တယ်။ မိဘညီအစ်ကိုမောင်နှမ မရှိနေတော့ သူငယ်ချင်းများက ၀ိုင်းဝန်းပြုစုပေမယ့် သူတို့လည်း အလုပ်သမား များ ဖြစ်တဲ့အတွက် အချိန်သိပ်မပေးနိုင်ကြပါဘူး။ အခုတော့ ကျွန်တော်တို့အဖွဲ့ရဲ့ တန်းလျားမှာ နေထိုင်နေပါ တယ်။ ထိုင်းရောက် အလုပ်သမားများ အများစု သိမှာပါ ထိုင်းဒညင်းသီးကို တတ်ခူးစားရင်း အခုလိုဖြစ်ရတာပါ။ တစ်ကယ်တမ်းဝယ်စားရင် ဘတ် ၂၀ လောက်ရယ်ပါ။ သတိထားရမယ့် အကြောင်းအရာလေး တစ်ခုလည်း ဖြစ်ပါတယ်။

ဖူးကက်အပြန် ပြောစရာ ကျန်ခဲ့တယ်

2009-05-06T23:45:00.000+07:00

ဒီနေ့ အလုပ်ကအပြန်အမှာ ပြောစရာတွေရင်ထဲမှာ ကျန်ခဲ့တယ်။ ဆိုင်ကယ်မှောက်ပြီး အခက်အခဲဖြစ်နေတဲ့ ညီလေးတစ်ယောက်ရဲ့ ဓာတ်ပုံပါ။ ဘယ်ဘက် ခြေထောက်က အသားအစားထိုးရမှာပါ။ အသက် ၂၁ နှစ်သာရှိပါသေးတယ်။ မိဘ အသိုင်းအ၀ိုင်း ကလည်း မရှိတော့ သူငယ်ချင်းများနဲ့ လုပ်ဖော်ကိုင်ဖက် များက ပြုစုစောင့် ရှောက်ထားရပါတယ်။ ဆေးကုသစားရိတ် မတတ်နိုင်တဲ့အတွက် ဆေးရုံကို မတတ် နိုင်ပဲ အလုပ်တန်းလျားကနေပြီး ကုသမှုခံယူနေရပါတယ်။ ဘတ်ငွေ သုံးသောင်းခွဲခန့် ကုန်ကျမှ သက်သာပျောက်ကင်းမယ့် သဘောရှိပါတယ်။ မနက်ဖြန်တော့ တစ်ခေါက် ထပ်သွား ရမယ်။ ဆေးရုံထိလိုက်သွားပြီး စားရိတ်မျှပေးနိုင်ဖို့ အတွက်ညှိုနှိုင်းပေး ရပါလိမ့် နောက်မို့ ဒီညီလေး ခြေထောက်ဖြတ်ရမယ့် သဘောရှိပါတယ်။ ဖြစ်ကာစက ဗယ်ဘက် ညှပ်ရိုးပါ ပွင့်ပြီးကျိုးသွားပါတယ်။ အရေပြားအပေါ်က ဒဏ်ရာကို တစ်ချက်ချုပ်ထားပေးပြီး၊ မညီမညာ နဲ့ အရိုးပြန်ဆက်နေတဲ့အတွက် လှုပ်ရှားလို့ သိပ်မရသေးပါဘူး။ ဆေးရုံရဲ့ ဂရုမစိုက်မှုကြောင့် (သို့) ပိုက်ဆံ မပေးနိုင်တဲ့ အတွက်ကြောင့် ဒီအတိုင်းပြန်ဆက်သွားတဲ့ သဘောရှိပါတယ်။
ပန်းရံ ဆိုက်တစ်ခုကို ထပ်ရောက်ဖြစ်သေးတယ်။ ရွှေ့ ပြောင်းမြန်မာ အလုပ် သမား ၅၀၀ ကျော်ရှိတဲ့ ပန်းရံဆိုက်တစ်ခုပေါ့။ ထားဝယ်၊ မွန် နဲ့ ရခိုင်လူမျိုး တွေအများဆုံး အလုပ်လုပ်ကိုင်လျှက်ရှိနေကြပါတယ်။ ပုံမှာမြင်တဲ့ အတိုင်းပဲ လုပ်ငန်းခွင်မှာ တစ်ယောက်မှ မရှိဘူး ခြောက်ကပ်ပြီး ချောင်ကပ်နေကြတယ်။ သူဌေးက သုံးလကျော်ပိုက်ဆံမရှင်းလို့ အလုပ်မဆင်းပဲ တိုက်ပွဲဝင်နေကြ တယ်တဲ့။ အောင်မြင်ပါစေဗျာ။

ဘုန်းဘုန်းကို မဲပေးကြပါစို့

2009-04-15T04:11:00.007+07:00

သင်္ကြန်ရုံးပိတ်ရက် လေပေါ်မှာ အိမ်အသစ်ဆောက်နေလို့ ရေမစိုပဲ ထိုင်း သင်္ကြန်ပြီး သွားတယ်။ လေလှိုင်း ပေါ်မှာ အိမ်အသစ်ဆောက် နေရင်း ဘုန်းဘုန်း အရှင်မေတ္တာစာရ ဘလောက် ကို မဲပေးဖို့ လင့်တွေ့လို့ ၀ိုင်းဝန်း မဲပေးကြဖို့ တိုက်တွန်းနှိုးဆော်အပ် ပါတယ်ခင်ဗျာ။ ဒီတစ်ခါ မဲပေးနည်း ကပုံစံ အသစ်ပါခင်ဗျာ။ အဆင့်ဆင့်လေး တွေရှိတယ် ဆိုပေမယ့် လွယ်ပါတယ်ခင် ဗျာ။

အဆင့် ၁။ မဲပေးရမယ့် လိပ်စာက ဒီမှာ ပါခင်ဗျာ။ လင့်လေးကို နှိပ်လိုက်တာနဲ့ မဲပေးရမယ့် စာမျက်နှာကို ရောက်ပါ တယ်ခင်ဗျာ။ စာမျက်နှာ အလည်လောက်မှာ News ဆိုတဲ့ ခေါင်းစဉ်အောက်မှာ အရှင်မေတ္တာစာရ ရဲ့ ဘလောက်ဂ်လေးကိုတွေ့ပါမယ်။

ဘလောက်ဂ် ရဲ့အောက်မှာ အ၀ိုင်းလေးကို အမှတ်လေးပေးခဲ့ပါမယ်။ ပြီးရင်အောက်ဘက်ကိုဆက်သွားပြီး အနီရောင် လေးထောင့်အ၀ိုင်းကို ကလစ်လိုက်ရင် အဆင့်နှစ်ကို ရောက်ပါပြီ။

အဆင့် ၂။ အပေါ်ပိုင်းစာမျက်ကိုပြန်တက်သွားရင် ညာဘက်ကော်လံထောင့်မှာ အရှင်မေတ္တာစာရ နာမည်နဲ့ အနီရောင်လေးထောင့် အ၀ိုင်းလေးထပ်တွေ့ပါမယ်။

အဲဒီမှာ ဗို့ အတွက်ကလစ်ပေးပြီး အောက်မှာ မေးထားတဲ့ အချက်အလက်တွေကို ဖြည့်ပြီး နှိပ်လိုက်ရင် အဆင့်နှစ်ပြီးလို့ အဆင့်သုံးကိုရောက်ပါမယ်။

အဆင့် ၃။ အဲဒီမှာ မိမိရဲ့ သူငယ်ချင်းနှစ်ရောက်ရဲ့ မေးလ်လိပ်စာကိုတောင်းပါမယ်။
ဖြည့်ပြီးလို့ ကလစ်လိုက်တာနဲ့ မဲပေးတဲ့ အဆင့်အောင်မြင်စွာပြီးဆုံးပါပြီခင်ဗျာ။ ကျေးဇူးတင်ပါတယ် ခင်ဗျာ။
ကျွန် တော် တို့ ဘုန်းဘုန်းအတွက် မဲဝိုင်းပေး ကြပါစို့။

ပြေးပြေးလွှားလွှား မြန်မာ့အလုပ်သမား

2009-04-01T23:22:00.002+07:00

ချင်းမိုင်မှာ မြန်မာအလုပ်သမားနှစ်ဦးက ထိုင်းတက္ကသိုလ် ကျောင်းသူတစ်ဦးကိုမုဒိန်းကျင့်ပြီး သတ်လိုက်လို့ လူဖမ်းပွဲကြီး ချင်းမိုင်မှာ ကျင်းပခဲ့တာရယ်။ ထိုင်းနိုင်ငံတောင်ပိုင်း ဆက်ထွန်ခရိုင်မှာဖြစ်တဲ့ လူသတ်မှု နောက်ဆက်တွဲ ဖမ်းဆီးပွဲတွေကို ကြားရတာ စိတ်မကောင်းဖြစ်မိပါတယ်။ ကိုယ်တိုင်ကြုံတွေ့ ပြေးလွှားဖူးတော့ ကိုယ်ချင်းလည်းစာမိပါတယ်။ ကျွန်တော်တို့မြန်မာ အလုပ်သမားတွေရဲ့ ဘ၀ကိုနားလည် နိုင်အောင်လို့ မှတ်တမ်းရိုက်ကူး ထားတာလေး ကိုပြန်လည် တင်ပြပေးလိုက်ပါတယ်။ မှတ်တမ်းအသုံးပြုခွင့်ပေးတဲ့ သူငယ်ချင်းကိုလည်း ကျေးဇူးတင်ပါတယ်။

သားသား ဘာကြောင့် ကျောင်းပျက်လည်း

2009-04-01T01:26:00.002+07:00

ဒီဓာတ်ပုံထဲ သားသား တစ်ယောက်လည်း ပါတာပေါ့

သားသားအကြောင်း ကိုပြောပြချင်ပေမယ့် ပြောသင့်မပြောသင့်စဉ်းစားနေတာ။ ဒီနေ့တော့ စကားပြန်ပြောဖြစ် ရင်းပြောမယ်လို့ ဆုံးဖြတ်လိုက်တယ်။ မြန်မာအလုပ်သမားတွေရဲ့ ကလေးတွေခံစားနေရတာလေးတွေ သိအောင် ပေါ့။ ကျွန်တော်က ကျောင်းဆရာမဟုတ်ပေမယ့် ကလေးတွေကို ကျမ်းမာရေး ပညာပေးရင်း ကျောင်းတိုင်းကို တပတ်တခါရောက်ဖြစ်ပါတယ်။ သားသားကို ပထမတစ်ပတ်မှာ မတွေ့လို့ သားသား ကျောင်းဘာလို့ မတတ်တာ လည်းကွ လို့ မေးကြည့်တယ်။ သားသားက ဘယ်လိုပြန်ဖြေတယ်မှတ်လည်း "သားသားမေမေက လင်ငယ် နောက်လိုက်သွားလို့တဲ့၊ သိပ်မကြာပါဘူး ဖေဖေလည်း မယားငယ်နောက် လိုက်သွားတယ်။ သားအခု အဖွားနဲ့နေတယ်။ အဖွားကလည်း လင်ငယ်ရှိသေးတယ်တဲ့ အဲဒါကြောင့် သားကျောင်းမတက်တာပါတဲ့။" သူပြောပြတဲ့ သူ့အကြောင်းကို ကြားရတော့ ဘာပြောရမှန်းတောင် မသိဖြစ်သွားတယ်။

ငါသေရင်

2009-03-30T12:02:00.000+07:00

ကိုကြည်တစ်ယောက် စိတ်မောလူမောနှင့် အခန်းပြန်ရောက်လာသည်။ မိန်းမတစ်ယောက်ကို မီးဖွားပေးခဲ့ရခြင်း ဖြစ်သည်။ မီးဖွားပေးရ၊ အလုပ်ခွင်ဒဏ်ရာရသူတွေကို ပြုစုကုသရ၊ တစ်ခါတလေ ထိုင်းရဲက ဖမ်းလို့၊ အချုပ်ထဲမှာ ဒုက္ခရောက်လို့ ဆိုရင်လည်း ကိုကြည်တို့ ပါရသည်။

မီးဖွားပေးသည်ဆို၍ ကိုကြည့်ကို ဆရာဝန်လား ထင်ကြမည်။ ဆေးပညာ မဆိုထားနှင့် သူနာပြုသင်တန်းပင် ကိုကြည် ဟုတ်ဟုတ်ငြားငြား တက်ခဲ့ဖူးတာ မဟုတ်။ ထိုင်းနိုင်ငံမှာ အလုပ်လာလုပ်ရင်း ရွှေ့ပြောင်း အလုပ်သမားတွေကို အကူအညီပေးသော အဖွဲ့တစ်ခုမှာ ဝင်လုပ်သည်။ အခြေအနေ၏ လိုအပ်ချက်အရ သူနာပြုသင်တန်း ရက်တိုလေးတွေ ပြေးတက်ရင်း သူနာပြုဆရာ ဖြစ်လာရသည်။ နောက်တော့ လုပ်ရင်းကပဲ အသားကျလာသည်။

ရွှေ့ပြောင်း အလုပ်သမားတွေဘဝမှာ အဖက်ဖက်က အဖိနှိပ်ခံဘဝဖြစ်သည်။ အလုပ်ရှင်ကနှိပ်စက်၊ ထိုင်းရဲက နှိပ်စက်၊ ဒါတင် မကေသေး၊ အရပ်သားထိုင်း တွေကလည်း အနိုင်ကျင့်ကြသေးသည်။ နိုင်ငံကူးလက်မှတ်မပြောနှင့်၊ ရှိသင့်ရှိထိုက်သည့် ဘတ် ခေါ် အလုပ်သမားကဒ်ပင် မရှိတော့ သူတို့ဘဝမှာ ပြုသမျှ ခေါင်းငုံ့ခံရသည့်ဘဝ။ ကလေးမွေးလည်း ဆေးရုံသွားလို့မရ။ ဆေးရုံစရိတ်လည်း တတ်နိုင်သည်မဟုတ်။ အလုပ်ခွင် ခြေပြတ် လက်ပြတ်၊ ထိခိုက်ဒဏ်ရာရရင်လည်း ကိုကြည်တို့သာ အားကိုးရာ။

ဒီ့ထက်ဆိုးတာကတော့ နာရေးဖြစ်သည်။ ကိုကြည်တို့က လူနာဆောင် သဘော တန်းလျားလေးရှိသည်။ လုံးဝကို ပြုစုစောင့်ရှောက်မှုလိုသော လူနာများကို ထားရသည်။ HIV ပိုး ကူးစက်နေသူလည်း ပါသည်။ အများအားဖြင့် နာတာရှည် ရောဂါနှင့် သေရက် စောင့်နေကြသော မျှော်လင့်ချက်မဲ့ လူသားများဖြစ်ပါသည်။

တစ်ယောက်ယောက် သေပြီဆိုရင် ကိုကြည်တို့က အပြင် သယ်ထုတ် သွားသည်။ ပြောရလျှင် ဒီအသုဘတွေကို ပို့မည့်ဆွေမျိုးဥာတိ လည်း မရှိကြပါ။ သင်္ဂြိုလ်ပေးဖို့ရာလည်း ကိုကြည်တို့ တာဝန်။ ညနေစောင်း ဒါမဟုတ် ညဘက်လောက်မှာ လူနာဆောင်ကနေ အလောင်းကို သယ်ထုတ်သွားပြီး ကိုယ့်ဖာသာ သင့်သလို သင်္ဂြိုလ်ရသည်။ ကိုကြည်နှင့် ကိုပေါတို့က ဒိုင်ခံ လုပ်ရသူများ။ အခေါင်းဝယ်ဖို့ ပိုက်ဆံငွေကြေး မရှိပါ။ ရှိသမျှလူနာအတွက် ဆေးဖို့ဆိုတာတောင် အလျဉ်မီသည် မဟုတ်သေး။ မဖြစ်မနေ ရက်လည်ဆွမ်းသွပ်၊ အမျှဝေတာ ကတော့ ကိုကြည်တို့ လုပ်ပေးပါသည်။ သို့သော် အသုဘ အခေါင်းဖို့တော့ မတတ်နိုင်။

ညမှောင်မှ လူတစ်စုနဲ့ အလောင်းကို သယ်ထုတ်ပြီး ဖျာနဲ့ပတ် မီးသင်္ဂြိုလ် ရသည်။ လူနာဆောင်က လူနာတွေကို ဒါကို မသိစေပါ။ သူတို့ကတော့ အလောင်းကို သယ်ထုတ်သွားတာသာ မြင်သည်။ ဖျာနဲ့ပတ်ပြီး မီးသင်္ဂြိုလ် လိုက်ရတာဆိုတာ သေဖို့စောင့်နေသူတွေကို မသိစေတာ တရားသည်ဟု ကိုကြည်တို့ ထင်ပါသည်။ အခေါင်းဖိုးဆိုတာလည်း မြန်မာ့မျက်စိနဲ့ကြည့်ရင် မနည်းလှ။ ဘတ်လေးထောင်ကနေ ခြောက်ထောင်ဆိုရင် မြန်မာငွေနဲ့ ပြောင်းတွက်ကြည့်၊ တစ်သိန်းခွဲ နှစ်သိန်းကျော်။ ဒီမှာ ရိုးရိုးအလုပ်သမား တစ်ယောက်၏ လုပ်ခတစ်လစာ အသာလေးရှိသည်။ မရွံမရှာနှင့် အနွံတာခံနိုင်သော ကိုကြည်နှင့် တကိုယ်တည်းသမား ကိုပေါတို့က အဓိက လုပ်ပေးကြရသူများ။ သူတို့ အဖွဲ့သားများသာ ဒီအခက်အခဲနှင့် ဝမ်းနည်းဖွယ် မလှပသော နောက်ဆုံးခရီးကို အတွင်းကျိတ် သိထားသူများသာ။

ကိုကြည်ကတော့ စိတ်ထားတတ်ဖို့ ကြိုးစားသည်။ ပူပူနွေးနွေး ဇနီးသည်ကြောင့်လည်း နေသာထိုင်သာရှိပါသည်။ တစ်ကိုယ်တည်းသမား ကိုပေါကတော့ အနိုင်နိုင်ထူထားရသော စာကြည့်တိုက် အစုတ်ကလေးမှ တရားစာအုပ်တွေသာ တွင်တွင်ဖတ်နေတာ တွေ့ရသည်။ ဒီနေ့လည်း ဖျာစုတ်နှင့်ပြီးရသည့် အသုဘမှပြန်ခဲ့တော့ ညကိုးနာရီ ရှိနေပါပြီ။ ကိုကြည် ထမင်းတောင် သိပ်မစားနိုင်။ အိပ်ချင်လှသည်။ ခေါင်းချတာနှင့်ကို အိပ်ပျော်သည်။ သန်းခေါင်ရောက်မှ မော်ဒယ်လ်ညံ့ညံ့ မိုဘိုင်းဖုန်းမှ စူးစူးဝါးဝါးမြည်သံကြောင့် ကိုကြည်လန့်နိုး လာသည်။

အင်း…ဘာများဖြစ်ပြန်ပြီလဲဟု ကိုကြည်စိတ်မသက်မသာ တွေးမိသည်။ ဖြစ်ပြီဟေ့ဆို ညရေးညတာ မရှောင် သွားရတာပဲ မဟုတ်လား။ ဖုန်းဆက်သူက ကိုပေါဖြစ်သည်။

“ပြော ကိုပေါ၊ ဘာဖြစ်ပြန်သလဲဗျ၊ ဘာကေ့စ်လဲ”

“မဟုတ်ပါဘူးကွာ၊ ငါတစ်ခုမေးချင်လို့ပါ”

ကိုပေါက တုံ့ဆိုင်းဆိုင်းပြောသည်။ ဘာမှ မဖြစ်မှန်းသိတော့ ရင်ထဲက အလုံးကြီးကျသွားသော်လည်း ဘာမှ မဟုတ်ပါဘူးဆိုပြီး ညကြီး သန်းခေါင် ဖုန်းခေါ်သော ကိုပေါကို ကျွဲမြီးတိုမိသည်။

“ကဲ…မေးဗျာ၊ မေး…မေး”

“လူဆိုတာ ကွေးသောလက် မဆန့်မီ၊ ဆန့်သောလက် မကွေးမီ၊ သေတတ်တယ် မဟုတ်လားကွ”

ခုမှ ကိုကြည် အထွဋ်အထိပ် စိတ်တိုတော့သည်။

“ဟုတ်တာပေါ့ဗျာ။ နက်ဖြန်တောင် ခင်ဗျား မာလကီးယားရင် ယားသွားမှာဗျ”

စိတ်ပေါက်ပေါက်နဲ့ ပြောလိုက်သည်။

“ကဲ… ဒါပဲလားဗျ”

“နေပါဦး။ ငါပြောစရာ ရှိသေးလို့ပါ၊ ငါအခု အရှင်ဆန္ဒာဓိကရဲ့ တရားစာအုပ် ဖတ်နေတာ”

ကိုကြည် အိပ်ချင်မူးတူးနှင့် စိတ်လည်း ဆိုးလှပြီ။

“အေး…အဲဒါ ဘာဖြစ်လဲဗျ”

“ဒါနဲ့ အသုဘ အခေါင်းတစ်လုံး ဘယ်လောက်ရှိမလဲကွ၊ အနည်းဆုံးပေါ့ကွာ။”

ကိုပေါ စိတ်မှ မှန်သေးရဲ့လားဟု ကိုကြည် တွေးမိလိုက်သေးသည်။ အလောင်းတွေမြင်တာများပြီးများ ကြောင်သွားလေသလား။

“အနည်းဆုံးတော့ ဘတ်သုံးထောင်တော့ ရှိမှာပေါ့ဗျ”

“အေး…ငါပိုက်ဆံစုထားတာ နှစ်ထောင်တော့ ရပြီကွ။”

ကိုကြည်က အော်ထည့်လိုက်သည်။

“အဲဒါ ဘာဆိုင်လဲဗျ”

“အဲဒါကွာ…ငါမင်းကို တစ်ခုမှာချင်တာ။ ငါဗြုန်းကနဲ သေရင် တို့တွေ လုပ်နေကျလို ဖျာလိပ်နဲ့ပတ်ပြီးတော့တော့ ငါ့ကိုမသင်္ဂြိုလ်ပါနဲ့ကွာ။ ငါစုထားတာမှာ လိုသလောက်စိုက်ပြီး အခေါင်းလေးနဲ့တော့ လုပ်ပါ”

ကိုကြည်ရင်ထဲမှ ဒေါသများဖြတ်ကနဲပျောက်ပြီး ဝမ်းနည်းမှုများသာ လှိုက်ကနဲ တက်လာလေတော့သည်။

သင်ကာ
ကိုသင်ကာ ဘလောက်မှ ကူးယူပါသည်။

သံတိုင်နောက်မှ ကြွေလွင့် ပန်းစက္ကူ

2009-02-23T01:29:00.001+07:00

ဖေဖေါ်ဝါရီ ၁၄ ရက် ဖူးခတ်ကို သွားတဲ့လမ်းမှာ ဒီဓာတ်ပုံကို ရိုက်ခဲ့ပါတယ်။ ဆိုင်ကယ် တက္ကစီ ကိုတားမြန်မာ အလုပ်သမား နှစ်ယောက်ကို ဖမ်းပြီးလမ်းဘေးမှာ ဆောင့်ကြောင့်လေးထိုင်ခိုင်းထားတာ တွေ့လို့ဖုန်းထဲက ကင်မရာနဲ့ဓာတ်ပုံ ရိုက်မိတယ်။ ရဲက တွေ့သွားလို့ ကားပေါ်ကဆင်းခိုင်းပြီး စစ်ဆေးတယ်။ ဓာတ်ပုံကို ပြန်ဖျက် ခိုင်းခဲ့တယ်။ လူလည်း ထူထူပူပူနဲ့ ဓာတ်ပုံမရှိတဲ့ ဖိုင်ကိုအကြိမ်ကြိမ်ပြမိတယ်။ ရဲလည်း တောက်တခေါက်ခေါက်နဲ့ ကျွန်တော့်ကို သွားခွင့်ပြုလိုက် ရတယ်။ အဲဒီ အတောအတွင်းမှာ လက်အုပ်ကို ချီပြီး စ၀ါဒီခပ် နဲ့ ခေါထို့ ပေါင်းအကြိမ် မရေတွက်နိုင်အောင်လုပ်ခဲ့ရတယ်။ ဘာကြောင့် ကျွန်တော်ဓာတ်ပုံ ရိုက်လိုက်တယ် ဆိုတာ ကျွန်တော်အကြိမ်ကြိမ်ပြန်စဉ်းစားမိပါတယ်။ အဲလို ရိုက်ခဲ့တဲ့ဓာတ်ပုံ တစ်ချို့ လည်း ကျွန်တော့်ဆီမှာ ရှိနေပါ သေးတယ်။ ဘာကြောင့် အဲလို အကြိမ်ပေါင်းများ စွာဓာတ်ပုံ ရိုက်မိနေတာလည်း ဘာကြောင့်ပါလည်း......။
သံတိုင်နောက်မှ ကြွေလွင့် ပန်းစက္ကူ
နေ့ခင်းပိုင်း တစ်ရက်မှာ ဆေးခန်းလာပြတဲ့ အစ်မတစ်ယောက်ပြောပြတဲ့ ၀မ်းနည်း ကြေကွဲဖွယ် ဇတ်လမ်းလေး တစ်ပုဒ်ရှိခဲ့ပါတယ်။ သူမအလုပ်လုပ်နေတဲ့ ပန်းရံဆိုက်တစ်ခုကို ရဲဝင်ဖမ်းလို့ သူမအပါအ၀င် တစ်ချို့ အဖမ်းခံရပြီး ဖန်င အချုပ်ထောင်ကိုပို့ခြင်း ခံခဲ့ရပါတယ်။ ကျောက်တောင်နောက်ခံ ရှိတဲ့ အချုပ်ထောင်ရဲ့ အေးစက်စက်ကြမ်း ပြင်မှာ အိပ်စက်ခဲ့ရပါတယ်။ တစ်ပတ်ခန့် အကြာနေထိုင်ပြီး ဆံပင်ရှည်ရှည် မဖြူမညို အသားအရည်နဲ့ မိန်းမချော ငယ်လေး ရောက်လာခဲ့ပါတယ်။ အားလုံးက နှမငယ်လေးလို ၀ိုင်းဝန်းစောင့်ရှောက်ပြီး သူတို့ လွတ်မြောက်နိုင် ဖို့အရေးအတွက် ပွဲစားအကူအညီနဲ့ ကြိုးစားနေခဲ့ကြပါတယ်။ မိန်းမချောငယ်လေး အချုပ်ကိုရောက်ပြီး နှစ်ရက်ခန့် အကြာမှာ အသက်ကြီးကြီးရဲတစ်ယောက်က သူ့အမေလာရွေးထုတ်တယ် ပြောလို့။ ၀မ်းသာစွာနဲ့ ကောင်မလေးနင် ကံကောင်းတယ်ဆိုပြီး ထဲ့လိုက်တယ်။ နောက်တစ်ရက်ညနေမှာ ပဲကောင်မလေး ပြန်လာ တယ် နင့်ကို နင့်အမေလာရွေးတယ်ဆို ဘာဖြစ်လို့ပြန်ရောက်လာတာလည်းမေးတော့ ကောင်မလေးရှိုက်ကြီး တငင်ငင်ငိုပြီးတော့ ပြောပါတယ်တဲ့။ အမေလာရွေးတာ မဟုတ်ပါဘူး သူ့ကို တည်းခိုခန်း ခေါ်သွားပြီး အကြိမ်ကြိမ် အိပ်တယ်လို့ ပြောပါတယ်။ သူကောင်မငယ်လေးကိုဖတ်ပြီး ငိုလိုက်ရတာတဲ့။
သူကျွန်တော့်ကို ပြောပြနေရင်း ငိုနေသေးလို့ ဖျောင်းဖြပြီး အိပ်ပျော်ဖို့ ဆေးနဲ့ အားဆေးပေးလိုက်ပါတယ်။ သူပြန်သွားပြီးနောက် ကျွန်တော်လည်း ငိုခဲ့မိပါတယ်။ သြော်....... ဒို့ သွေးချင်းတွေ အခုလိုအဖြစ်မျိုးနဲ့ ဘယ်လောက်တောင်ကြွေလွင့်ခဲ့ရပြီးပြီလည်း နောက်ထပ်ကော ဘယ်လောက်တောင် ထပ်ကြွေကြရအုံးမှာ လည်းဆိုတာ...........။

ရာဇ၀င်ထဲက ကြွေပွင့်များ

2009-02-19T00:31:00.003+07:00

ရွက်ကြွေတောမှာ
ငါ ရောက် နေခဲ့
လေးနှစ်နဲ့ သုံးလ စွန်းခဲ့ပေါ့....။
အဲဒီကာလရဲ့ အတွေ့အကြုံ
အဖြစ်အပျက်စုံ ဇတ်လမ်း
မှတ်တမ်းမရှိပေမယ့်
ငါ့ဖြတ်သန်းမှုအရ သိခဲ့ရတယ်။
တွယ်ရာ မမဲ့ပေမယ့်
ကယ်ရာ မဲ့ခဲ့သူတွေ
ရွက်ကြွေတွေ အောက်မှာ
ငါတို့ရဲ့ ဆွေမျိုးပေါက်ဖေါ်တွေ
ဟိုတစ်ယောက် ဒီတစ်ယောက်
ဟိုတစ်ပွင့် ဒီတစ်ပွင့်
ကြွေလွင့်ခဲ့တာတွေ ရှိတယ်။
ရွက်ကြွေတွေ အောက်မှာ
ပျောက်ဆုံးခဲ့ရတဲ့
နှလုံးသွေးပိုင်ရှင်
ငါတို့သွေးချင်း အပျိုစင်တွေရဲ့
ဝိညာဉ် လှလှလေးတွေ ရှိတယ်။
ရွက်ကြွေတွေ အောက်မှာ
ရောက်ခဲ့ရတဲ့ မိခင်လောင်းတွေ
လင်သေ လက်ကိုဆွဲ
အံကို ကြိတ်ခဲလျှက်
ရမက် ကြွေးတွေ အတွက်
အသက်စတေးခဲ့ရတာတွေ ရှိတယ်။
ရွက်ကြွေတွေ အောက်မှာ
တစ်ယောက်နှင့် တစ်စု
စားကျက်လုရင်း
ကြွင်းကျန်ရစ်တဲ့
သွေးဖြစ် ရုပ်ကြွင်းတွေ ရှိတယ်။
ရွက်ကြွေတွေ အောက်မှာ
ရှမ်းပြည်ရောက် မြန်မာတွေရဲ့
အရှက်နဲ့ သိကာတွေ
အသက် သွေး ချွေးတွေ
ဒု နဲ့ ဒေးမျှ ရှိခဲ့တယ်။
သြော်.......
ရွက်ကြွေတောမှာ
ငါရောက်နေတာ လေးနှစ်ကျော် ဆိုပေမယ့်
ဆယ်စုနှစ် သုံးနှစ်ကျော် ဖြစ်ပျက်ခဲ့တဲ့
ငါ မသိသေးတဲ့.......
ငါ မသိနိုင်ခဲ့တဲ့.......
သမိုင်းမထင်တဲ့ ရာဇ၀င် ကြွေပွင့်တွေအကြောင်း
ထောင်သောင်းမက ရှိနေဦးမယ်ဆိုတာ
ရွက်ကြွေတောတွေက သိမှာပါ။
ဟော.............. ကြည့်
အခုလည်းလေ
ရာဘာရွက်တွေ ကြွေနေပြန်ပြီ......။

ရှမ်းပြည် = ထိုင်းနိုင်ငံ

Diphenhydramine (ဒိုင်ဖန်ဟိုက်ဒြာမင်း)

2009-01-31T00:21:00.000+07:00

ဟစ်စ်တမင်းတုံ့ပြန်ဆေးတစ်မျိုးဖြစ်သည်။ အအေးမိနှာစေးချောင်းဆိုးခြင်းကို သက်သာစေနိုင်သည်။

အသုံး

အအေးမိခြင်း၊ ဓာတ်မတည့်ခြင်း၊ လေပြွန်ရောင်ခြင်းတို့ကြောင့်လည်ချောင်းယား၊ နှာရည်ယို၊ နှာချေ၊ ချောင်းဆိုး ခြင်းကို သက်သာစေရန်အသုံးပြုသည်။

ဆေးညွှန်းနှင့် အသုံးပြုပုံ
သလိပ်ဟတ်ထုတ်ရ လွယ်ကူစေသော အမိုနီယမ်ကလိုရိုက်နှင့် အမိုနီယမ်စစ်ထရိတ် သလိပ်ပျော်စေသော ဘရွမ်ဟက်ဆင်း၊ လည်ချောင်းယားခြင်းကို သက်သာစေသော မင်သော်စသော ဆေးများနှင့် ပေါင်းစပ်ပြီး အအေးမိနှာစေး ချောင်းဆိုးပျောက်ဆေးရည်များအဖြစ် ထုတ်လုပ်လေ့ရှိသည်။ များသောအားဖြင့် ၅ စီစီ လက်ဖက်ရည်ဇွန်းတစ်ဇွန်းတစ်နေ့သုံးကြိမ်၊ လေးကြိမ်ခန့်သောက်နိုင်ပါသည်။

သတိပြုရန်
အိပ်ငိုက်စေသဖြင့် ယာဉ်မောင်းနေသူများ၊ စက်ယနရားဖြင့် အလုပ်လုပ်သူများ သတိထားရမည်။ အရက်မ သောက်သင့်ပါ။

ဆေးအပြစ်များ
အိပ်ငိုက်ခြင်း၊ ခေါင်းကိုက်ခြင်း၊ အာခြောက်ခြင်း၊ မျက်စိပြာခြင်း၊ ခေါင်းနောက်ခြင်း၊ ၀မ်းချုပ်ခြင်း၊ ခြေလက်တုန် ခြင်း၊ ရင်တုန်ခြင်း၊ နှလုံးခုန်မမှန်ခြင်းတို့ ဖြစ်နိုင်ပါသည်။

ရှောင်ရန်
ဆေးနှင့်မတည့်သူများ

ဝယ်ယူရရှိနိုင်သော ဆေးအမည်အချို့ 
Broncho Hexal, Diphendryl, Diphenhydramine, Zeet

ဇန်န၀ါရီ ၃၀

2009-01-30T23:39:00.002+07:00

ခရီးရှည်ထွက်ရမှာ မို့စောစောထမယ်စိတ်ကူးပေမယ့် မထနိုင်ခဲ့ဘူး။ ၈နာရီ ခွဲကျော်မှပဲထဖြစ်တယ်။ ၉ နာရီ ကနေ ၁၀ နာရီထိ လူထုကျန်းမာရေးသင်တန်း တစ်လပေးဖို့အတွက် ဆရာဝန်ကြီးတွေနဲ့ ထည့်သွင်းသင့်တဲ့ သင်ခန်းစာ တွေပြင်တယ်။ အဲဒီထဲမှာ ထူးထူးဆန်းဆန်း ဘယ်သင်တန်းမှာမှ မသင်တဲ့ သင်ခန်းစာတစ်ခုကို ထည့်သွင်း ခဲ့ပါတယ်။ မြန်မာရွှေ့ ပြောင်းအလုပ်သမားများအကြား ရေပန်းစား အသုံးများနေတဲ့ အာဆီယံ လို့ခေါ်တဲ့ မူးယစ်ဆေး တစ်မျိုးပါပဲ။ ဆရာဝန်ကြီးများနဲ့ လမ်းခွဲပြီး ကော့ကလွိုင်စာသင်ကျောင်းဘက်ကို ထွက်ခဲ့ပါ တယ်။
စာသင်ကျောင်းမှာ နေမကောင်းတဲ့ ကလေးများကို ကျန်းမာရေးစစ်ဆေးပေးပါတယ်။ အမျိုးသမီးကျန်းမာရေး သင်တန်းအတွက် အလုပ်ကပြန်လာမယ့် အမျိုးသမီးတွေကို စောင့်ရင်း ကလေးများကို ဗဟုသုတအနေနဲ့ ပုံပြင်လေးတွေ ပြောဖြစ်ပါတယ်။ နေ့လည် ၃ နာရီကျော်မှာ မြန်မာအလုပ်သမား အမျိုးသမီးများအတွက် ကျန်းမာရေးပညာပေးသင်တန်းလေးတစ်ခုကို ပြုလုပ်ခဲ့ပါတယ်။ အမျိုးသမီး ၁၃ ဦးတက်ရောက်ခဲ့ပါတယ်။ နှစ်နဲ့ချီပြီး အမြဲတမ်းသွားနေတယ်ဆိုပေမယ့် အဲဒီနေရာလေးမှာ ကျန်းမာရေးပညာပေးတာ ကျွန်တော့်အနေနဲ့ ပထမဦးဆုံးအကြိမ်ပါပဲ။ ဒီနေ့ဟာ ကော့ကလွိုင် ခေတ်တခုထဲမှာပဲ တစ်နေကုန်သွားခဲ့ပါတယ်။ ည ၇နာရီကျော်မှ ရုံးကိုပြန်ရောက်ပါတယ်။

ဇန်န၀ါရီ ၂၉

2009-01-30T02:36:00.001+07:00

ဓါးခုတ်ခံထိတဲ့ ညီလေးကမနေ့ကတည်းက ဖုန်းဆက်တိုက်ခေါ်နေတာ ကျွန်တော်လည်း မအားတာနဲ့ မသွားဖြစ်ဘူး။ ဒီနေ့တော့ ဖန်ငဆေးရုံကို ထပ်ရောက်ဖြစ်ပါတယ်။ ကျွန်တော်နေတဲ့ နေရာနဲ့က ဆေးရုံကို တစ်နာရီခွဲနီးပါးသွားရတာ။ အသွားအပြန်ဆိုရင် ၃ နာရီကျော်အချိန်ကုန်တယ်။ ဆေးရုံရောက်တော့သူတို့ဇနီး မောင်နှံနှစ်ယောက် ကျွန်တော့်ကိုထွက်စောင့် နေကြ တယ်။ ဖန်ငဆေးရုံကနေ ကပွန်ဆေးရုံကို လွှဲစာနဲ့ပြောင်း လည်း ကုသခိုင်းထားတယ်။ လက်မှာလည်း IV ပိုက်တန်းလန်းနဲ့ ဆေးရုံထပ် မပြောင်းရင် ရမလားလို့မေးလာ တယ်။ ဘာဖြစ်လို့လည်းမေးတော့ သူမြန်မာပြည်ကို ပြန်ပြီးကုသခြင်တယ်။ သူထိုင်းနိုင်ငံမှာ သူဆေးကုနေရင် သူ့အမျိုးသမီးက သူ့ကိုပြုစုရမှာဖြစ်တဲ့ အတွက် အလုပ်လုပ်ရမှာအခက်အခဲဖြစ်နေကြောင်းနဲ့ သူတို့မှာ ပိုက်ဆံမရှိ တော့တဲ့အကြောင်း၊ နောက်ပြီးတော့လည်း မြန်မာပြည်မှာ နို့ဆို့ကလေးလေးရှိတယ်ဆိုတဲ့ အကြောင်းကို ပြောပြ ပါတယ်။ သူမြန်မာပြည်ပြန်ပြီး ဆေးကုသမှုခံ ယူမယ်ဆိုတာကို ပွင့်ပွင့်လင်းလင်း ဆွေးနွေးတိုင်ပင်လာပါတယ်။ သူ့ရဲ့လက်ရှိအနာက ဆေးရုံမှာ ဆေးထပ် ကုဖို့ လိုသေးကြောင်း ကျွန်တော်ရှင်းပြပါတယ်။ တကယ်လို့ ကုသမှုမခံ ယူရင် ရောဂါပိုးဝင်ရောက်နိုင်ကြောင်းကိုလည်း သေသေချာချာရှင်းပြပါတယ်။
ကျွန်တော်သူတို့ မိသားစုအပေါ်မှာ တတ်နိုင်သလောက်အကူအညီပေးတယ် ဆိုပေမယ့် မိသားစုအရေးမှာတော့ ၀င်ရောက်ဆုံးဖြတ်ပေးဖို့ခက်ခဲလှပါတယ်။ သူတို့မှာ ဘတ်မရှိတဲ့အတွက် ရုံးကကားနဲ့ လိုက်ခြင်တယ်လို့ ပြောပါ တယ်။ ရုံးကကားကလည်း ဘတ်မရှိသူများတင်ခွင့်မရှိပါဘူး။ ဒါပေမယ့် ကျွန်တော် ခေါ်လာခဲ့ပါတယ်။ သူတို့ နေထိုင်ရာ အိမ်ရှေ့ ထိလိုက်ပို့ပေးခဲ့ပါတယ်။ သူတို့အတွက် ဆေးဖိုးကို ၆၉၀၀ ဘတ်ကျော်ကို ရှင်းပေးခဲ့ပါတယ်။ နေ့လည် ၂ ကျော်မှ ကျွန်တော်ထမင်းစားခဲ့ရပါတယ်။
ပါဝိစာသင်ကျောင်းမှာ ကျွန်တော့်ရဲ့ ကျန်းမာရေးအဖွဲ့ တီဘီရောဂါအကြောင်းကျန်းမာရေး ပညာပေးစစ်ဆေး နေတာကို ၀င်ကြည့်ခဲ့ပါတယ်။ ၃နာရီခွဲမှာ ရုံးကိုပြန်ရောက်ပြီး ခဏနားပါတယ်။ နောက်ပြီး စာသင်ကျောင်းမှ ကလေးတွေရဲ့ ကျန်းမာရေး စစ်ဆေးချက်တွေကို ၂၀၀၇ နဲ့ ၂၀၀၈ ပြန်ပေါင်းဖို့အတွက် လိုအပ်တဲ့ ဂရပ်တွေပြင် ပါတယ်။
ညနေ ၄ နာရီခွဲဝင်းကျင်မှာ တန်းလျားက လူနာတွေကို ထုပ်ပေးထားတဲ့ (ဘန်ချီ) အကြွေးစာအုပ်တွေကို သွားသိမ်းပါတယ်။ လူနာတွေရဲ့ စာရင်းကို တော့ဒီနေ့ ဘယ်အခန်းမှာ ဘယ်သူနေနေတယ်ဆိုတာကို တိတိကျကျ ကောက်ယူခဲ့ပါတယ်။ ARV ဆေးသောက်နေတဲ့ အေအိုင်ဒီအက်စ် လူနာယောက်ကျားလေး ၁၁ ဦးရယ်၊ အမျိုးသမီး ၃ ဦးရှိပါတယ်။ တီဘီဆေးသောက်နေသူ ၂ ဦး၊ လေဖြတ်သူ ၁ ဦး ၊ အသည်းပြည်တည်နာ ၁ ဦး ၊ ဆိုင်ကယ်တိုက်ပြီး အောက်ပိုင်းမသန်သူ ၁ ဦး ပေါင်း ၁၉ ဦးရှိပါတယ်။ ၁ နာရီကျော်ကျော်လောက်စကားပြောပြီး၊ ရုံးကိုပြန်လာခဲ့ပါတယ်။ (ဘန်ချီ) အကြွေးစာအုပ်ကို တွက်ကြည့်တော့ ၁၂၂၈၇ ဘတ်ဖိုးသုံးထားပါတယ်။ အမှန်တကယ်ဆိုရင် ကျွန်တော့မှာ အဲဒီလောက်သုံးပိုင်ခွင့်ပေးလို့မရပါဘူး။ ဒါပေမယ့်လည်း သုံးပြီးသား တွေဆိုတော့လည်း ရုံးမှာ စကားပြောရတော့မှာပေါ့။ သူတို့ခဗျာမှာလည်း နယ်စည်းမခြား ဆရာဝန်များ အဖွဲ့က ရိကာဖြတ်ထားတော့ ကျွန်တော်ပေးသုံးတဲ့ ဘတ်သုံးဆယ်ဟာ မလောက်မှန်းသိပါတယ်။ အဲဒီအတွက်လည်း ပြောအားမရှိပါဘူး။
ညပိုင်း ၇ နာရီလောက်ကနေစပြီး အမေရိကားက လုပ်အားပေးဆရာဝန်ကြီးနှစ်ယောက်နဲ့ တစ်လသင်တန်း အတွက် ကြိုတင်ပြင်မှုတွေအတွက် တိုင်ပင်တာ ည ၉ နာရီခွဲကျော်မှပဲ အိမ်ပြန်ရောက်ပါတယ်။

ဇန်န၀ါရီ ၂၈

2009-01-30T01:33:00.001+07:00

မနက်ပိုင်းမှာ ရုံးကိုမ၀င်သေးပဲ လူနာများရှိရာ တန်းလျား ကိုဝင်ခဲ့တယ်။ လူနာတွေ စုဝေးစကားပြောလေ့ရှိတဲ့ ကွပ်ပျစ် ပေါ်မှာပဲ စုဝေးထိုင်ပြီးစကားပြောဖြစ်တယ်။ မရောက်ဖြစ်တာ တစ်ပတ်ခန့် ကြာသွားတော့ သူတို့မေးခွန်း တွေက အများသား၊ သူတို့ ဘယ်လိုဆက်လက်နေထိုင်ရမလည်း ဆိုတာက အဓိကပါ။ နောက်တော့ ARV နဲ့ TB ဆေး အကြောင်းထပ်မေးတယ်။ တတ်နိုင်သလောက်ပြန်ဖြေပြီး ကိုယ်မေးချင်တာကို ပြန်မေးဖြစ်ပါတယ်။

လူနာထဲက ကိုစိုးနိုင် အလုပ်မဆင်းတာကြောင့် နေမကောင်းလို့ အလုပ်မဆင်းနိုင် တာလား လို့မေးကြည့်တော့ မျက်ရည်ဝဲပြီးပြောရှာတယ်။ သူပြီးခဲ့တဲ့ နှစ်လကလုပ်ခဲ့တဲ့ လုပ်အားခကို သူဌေးမရှင်းလို့ စိတ်ညစ်ပြီး အလုပ်မဆင်းတော့ဘူးတဲ့။ စိတ်မကောင်းဖြစ်မိတယ် သူ့ခမျာ ARV ဆေးသောက်ပြီး အလုပ်ကိုကြိုးစား လုပ်ခဲ့တာ အခုတော့ နှစ်လစာ လုပ်အားခမရဘူးတဲ့။ ၁၀ ကျော်ကျော်မှာ ရုံးကို ပြန်လာခဲ့တယ်။

နယ်စည်းမခြားဆရာဝန်များအဖွဲ့ က အစ်မတစ်ယောက်နဲ့ ၁၀နာရီ ခွဲလောက်မှာ တန်းလျားက လူနာတွေကိစ စကားပြောဖြစ်တယ်။ သူပြောတာက တန်းလျားမှာ နယ်စည်းမခြားဆရာဝန်များ အဖွဲ့က လူနာ ၁၉ ဦး တန်းလျား မှာနေနေတယ်တဲ့ ၁၆ ဦးက ARV ဆေးသောက်နေတယ်တဲ့ဘုရားဘုရား။ အခါတိုင်းလူနာတန်းလျားကိုသွား လည်တယ် အားလုံးနဲ့ ရင်းနှီးနေတယ် ဆိုပေမယ့် အဲဒီလောက် တိတိကျကျ မမှတ်ထားမိဘူး။ ထင်လည်း မထင်မိ ဘူး လူနာဦးရေတိုးလာနေပါလား။ လူနာများအတွက် စားဝတ်နေရေးနဲ့ ဆေးအတွက် မိနစ် ၂၀ ခန့်ဆွေးနွေး ခဲ့တယ်။ သူ့အမြင်ကိုယ့်အမြင် ဖလှယ်ခဲ့တယ်။

နေ့လည် ပိုင်းမှာ ဘန်နယားစာသင်ကျောင်းမှာ ကလေးတွေကို ကျန်းမာရေးပညာပေးဖို့ သွားတယ်။ ဒါပေမယ့် အခန်းဆုံးစာမေးပွဲစစ်ဆေးတာနဲ့ သွားတိုက်နေလို့။ ကျန်းမာရေး မကောင်းသူများကို ကြည့်ပေးပြီး မူကြိုကျောင်း ကိုဝင်ကြည့်ဖြစ်တယ်။ ကလေးတွေ ချစ်စရာကောင်းလိုက်တာ တန်းစီပြီးအိပ်သူက အိပ်လူသံကြားလို့ ပြူးကြည့် သူကပြူးကြည့်နဲ့။

ဇန်န၀ါရီ ၂၇

2009-01-28T00:28:00.001+07:00

(ကျောင်းသူ/သားများနဲ့ ပျော်ရွှင်စွာ)

၈ နာရီခွဲပြီးမှ အိပ်ယာထတာတောင် လူက မူးဝေေ၀၊ မနက် ၉ နာရီ အလုပ်ချိန်မှီဖို့ အရေးအပြေးအလွှား အလုပ်ရောက်တော့ ဘာမှမလုပ်နိုင်သေး ၁၅ မိနစ်လောက် ကြောင်တောင်တောင်ဖြစ်နေတယ်။ ပြီးမှ စာရွက်စာတန်းတွေ သိမ်းသင့်တာ ပြန်သိမ်းရတယ်။ သုံးနှစ်အတွင်းမှာ စုထားတဲ့ ကျန်းမာရေး စာအုပ်တွေကလည်း မနည်းမနော။ နောက်ကျောင်းသားတစ်ဦး ခြင်းစီရဲ့ ကျန်းမာရေးဆေးစစ်ချက် နဲ့ ကျန်းမာရေးသင်တန်း အမေးအဖြေ လွှာတွေကို မနှစ်ကဟာနဲ့ ဒီနှစ်ဟာ ပြန်ခွဲထုတ်တယ်။
နေ့လည်ပိုင်းမှာ တစ်လကျန်းမာရေး သင်တန်းအတွက် အချိန်ဇယားနဲ့ ဘာသာရပ်တွေကို လုပ်အားပေး ရောက်နေတဲ့ ဆရာဝန်ကြီးနှစ်ယောက်နဲ့ တိုင်ပင်ရေးဆွဲတယ်။ နေ့လည် ၂ နာရီ ၁၅ မိနစ်မှာ ပါကလန်ကျောင်း မှာကလေး သုံးဆယ်ကျော်ကို တီဘီ ရောဂါအကြောင်းသိသင့်တဲ့ အချက်တွေကို ပြန်ရှင်းပြပြီး စာမေးပွဲစစ်တယ်။ ၃ နာရီ ခွဲမှာ ရုံးကိုပြန်ရောက်ပြီး ဓာတ်ပုံတွေကို ပြန်စစ်တယ်။ ဓာတ်ပုံအဟောင်းထဲက ကျည်တစ်တောင့်ကို တွေ့ပြီး ကျည်တစ်တောင့်ရဲ့ နောက်ကွယ်မှာ ကိုရေးဖို့စိတ်ကူးမိတယ်။
ညပိုင်းမှာ ပို့စ်တစ်ပုဒ်ရေးပြီးတင်တယ်။ ကိုအောင်ဦး ဘလောက်မှာ တရားနာတယ်။ ဘလောက်တစ်ချို့ ကို လိုက် လည်တယ်။ နယ်စည်းမခြားဆရာဝန်များ အဖွဲ့က အစ်မ တစ်ယောက်ဆီကို ဖုန်းဆက်တယ်။ သူအခု ရနောင်း ကနေပြန်လာတာလမ်းမှာပဲရှိသေးတယ်တဲ့။ အနောက်ကြဆုံးအသုတ်လို့ ထင်ရတဲ့ ရိုဟင်ဂျာ လှေစီးဒုက သည်များ ရနောင်းဘက်မှာ ဖမ်းမိလို့ သွားကြည့်ရတယ်တဲ့။ လူနာ ၄ ဦးကိုလည်း ရနောင်းဆေးရုံကြီးမှာ တင်ပို့ ထားခဲ့ရ တယ်လို့သိရပါတယ်။ဝမ်းနည်းမိပါတယ်။ ဒီလိုအဖြစ်အပျက်မျိုးတွေခဏခဏကြုံတွေ့နေရပါတယ်။

ကျည်တတောင့် ရဲ့ နောက်ကွယ်မှာ

2009-01-27T23:10:00.003+07:00

အံ့ကြိတ်မျက်ရည် ကျပြီး အကောင်းဆုံးထွက်ပေါက်ရအောင်ရှာဖွေ ယုံမှတပါးအခြားနည်းလမ်း မရှိခဲ့ရပါဘူး။ ခံရသူ အဖို့ ရင်ကိုနင့်ခနဲ နင့်ခနဲ တစ်သက်မမေ့အောင် အိပ်မက်တွေထိ ခြောက်လှန့်ခြင်းကို ခံစားရ ပါတယ်။ ကြိုးစား မေ့ပျောက်ထားတာတွေဟာ တိုက်ဆိုင်မှုရှိလို့ မပြောမဖြစ်ပြန်ပြောရတဲ့အခါ အသစ်အတိုင်းပဲရင်မှာ ခံစားရ ပါတယ်။ သိမ်ငယ်မှုတွေနဲ့ ရောပြွန်းပြီး နေတတ်ပါတယ်။ ဒီသတင်း လေးကို အရင်ဖတ်ကြည့်ပါအုံး။ ကောင်မလေး မသေဘူးလို့ သိရတဲ့အချိန်မှာ ပစ်မှုကြူးလွန်သူတွေဟာ နှုတ်ပိတ်ဖို့ကြိုးစားပါတယ်။ စဖြစ်တဲ့ ညမှာပဲ ကျန်တဲ့အလုပ်သမားတွေပါ အလုပ်ဆက်မလုပ်ရဲတော့တဲ့ အတွက်အိမ်ကိုပြန်လာကြပါတယ်။ ကောင်မလေး ဆေးရုံက ပြန်ဆင်းလာတဲ့ညမှာပဲ နေအိမ်ကို သေနတ်နဲ့လှမ်းပစ် သံကြားရပါတယ်။ မိန်းကလေးများကို တစ်ခန်းထဲမှာ စုဝေးနေစေပြီး အမျိုးသားများကတော့ရှိရာ တုတ်၊ ဓါးတွေနဲ့ စောင့်ကြည့်နေ ခဲ့ကြပါတယ်။
ထိုင်းလူမျိုး အလုပ်ကြပ်ကို ညကအဖြစ်အပျက်ကို ပြောပြတဲ့ အခါ သီတင်းကျွတ်မို့လို့ ဗျောက်အိုးဖေါက်တာလို့ ညင်းဆိုပြီး ပြန်သွားခဲ့ပါတယ်။ အဲဒီညမှာပဲ နောက်ထပ်သေနတ်သံ ကြားတဲ့အတွက် တိတ်တဆိတ်သွားရောက် ပြီးကျည်ဆံခွန်ကိုကောက်ခဲ့ပါတယ်။ ကျည်ဆံခွန်ကိုပြပေမယ့်လည်း အလုပ်ကြပ်အနေနဲ့လည်း ဘာမှဆက် လက် မဆောင်ရွက်ပေးခဲ့တဲ့ အတွက် အလုပ်သမားတွေကို ပိုပြီးကြောက်လန့်စေခဲ့ပါတယ်။
အဲဒီကြောက်လန့်မှုတွေကြောင့် လူနာကောင်မလေးရဲ့ စိတ်ကျမ်းမာရေးကိုပိုပြီးထိခိုက်စေတဲ့အပြင် အသက် အန္တာရယ်ပါ စိုးရိမ်ရတဲ့ အနေအထားကိုရောက်စေခဲ့ပါတယ်။ ဆွေမျိုးသားချင်းများနဲ့ အတူနေသူများကလည်း သူ့ကိုလွတ်ရာနေရာကို ခေါ်သွားပေးဖို့ ကျွန်တော့ကုို အကူအညီတောင်းပါတယ်။ ဖြစ်ပေါ်လာနိုင်မယ့် အန္တာရယ် များထဲက သုံးခုကို ခေါင်းထဲကို ၀င်လာပါတယ်။
၁၊ ကောင်မလေးမှာ အလုပ်သမားဘတ်မရှိတဲ့အတွက် လမ်းခရီးမှာရဲအဖမ်းခံရမယ့် အန္တရယ်
၂၊ ကျွန်တော်ခေါ်ထုပ်သွားတာကိုသိပြီး အနောက်ကနေ လိုက်နှောက်ယှက်မယ့် အန္တာရယ်
၃၊ ကူညီပေးမယ့် နယ်ခံအတွက် အသက်အန္တာရယ် အစစအရာရာစဉ်းစားပြီး ကျွန်တော်လည်း ချက်ခြင်းဆုံးဖြတ် ရခက်ပါတယ်။ တပတ်ခန့်အကြာမှာမှခေါ်ထုတ်နိုင်ခဲ့ပါတယ်။ အခုတော့ ယာယီခိုလှူံသူများနေထိုင်ရာ တန်းလျား မှာနေထိုင်လျှက်ရှိပါတယ်။
ကျွန်တော်တို့ မြန်မာအလုပ်သမားတွေရဲ့ ဘ၀ဟာ ပါးလျားလှပါတယ်။ ဥပဒေရဲ့ ကာကွယ်မှုအောက်မှာ မရှိနေခဲ့ပါဘူး။ ကိုယ်ကအဆော်ကားခံရတယ်ဆိုပေမယ့်လည်း မပြီးသေးပါဘူး။ နောက်ဆက်တွဲ အန္တာရယ်တွေ ကိုပါ ရှောင်ရှားရင်း နေရာသစ်တွေမှာ ပြောင်းရွေ့ ပြီး အလုပ်လုပ်ကိုင် ကြရပါတယ်။

ဓားခုတ်ခံရသူနှင့် စကားပြောခြင်း

2009-01-27T03:22:00.001+07:00

ကျွန်တော်ဒီနေ့ (၂၆ရက်နေ့) ဖန်ငဆေးရုံကြီးကိုသွားဖြစ်တယ်။ ၂၄ ရက်နေ့ည ၉နာရီကျော်မှာ မြန်မာ အလုပ်သမား အချင်းချင်းစကားများ ရန်ဖြစ်ပြီး ဓားခုတ်မှုဖြစ်တယ်။ ဖြစ်ဖြစ်ခြင်းပဲ ဆေးရုံကိုတင်ပို့နိုင် ခဲ့ပါတယ်။ အခုတ်ခံရသူက ဗယ်ဘက်လက် သူကြွယ်ပြတ်သွားတယ်၊ပါးပြင်ကို ဓါးခုတ်မိလို့လွှာလိုက် သလိုဖြစ်သွားတယ်၊ သွားသုံးချောင်းပြတ်ပြီး၊ တစ်ချောင်းနဲ့သွားတယ်၊ ပြတ်ရာကအောက်နှုတ်ခမ်းထိရောက်သွားတာကြောင့်နှုတ်ခမ်း ကိုပါ သုံးချက်ချုပ်လိုက်ရတယ်။
ဆေးရုံကိုကျွန်တော်ရောက်သွားတော့ drip သွင်းပေးထားတယ်။ လက်သူကြွယ်ကိုဆေးထည့်ပေးထားတယ်။ အောက်နှုတ်ခမ်းကို သုံးချက်ချုပ်ပေးထားပြီး၊ ပါးပြင်နှစ်ဖက်ကိုတော့ ဟိုဘက်ထိပ် ဒီဘက်ထိပ် ကပ်ချုပ်ထား တယ်၊ အပြီးမသတ်ရသေးဘူး ဘတ်၇၀၀၀ ကျော်ဖိုး ဆေးရုံကစိုက်ထုပ် ကုန်နေပြီ။ လူနာရှင်ဘက်က ပိုက်ဆံ မပေးနိုင်တဲ့အတွက်ကုသမှု အားလုံးကိုရပ်ထားတယ်။ ဆေးရုံကနေပြီးရဲကို ဖုန်းဆက်ပြီးဖမ်းခိုင်းထားတာ ကြောင့် လူနာရှင်က ကြောက်လန့်ပြီး ပိုက်ဆံလျှောက်ချေးရာကနေအဆင့်ဆင့် ကျွန်တော့ဖုန်းနံပါတ်ကိုရပြီး ဆက်သွယ် လာတယ်။ ဆေးရုံကလည်း မြန်မာတွေကို ဆေးကုပေးလို့ ပျောက်ခါနီးရင် ဆေးရုံကနေပြီး ဆင်းပြေးတတ်လို့ အခုလိုလုပ်ရတယ်လို့ ဆိုပါတယ်။ ကျွန်တော်ဘက်မှလည်း လူနာထွက်မပြေးအောင် တာဝန်ယူကြောင်း ပျောက်ကင်းအောင်သာ ဆက်ကုပေးပါဆိုပြီး တောင်းပန်ဂတိပေးလျှက် အရေးပေါ်ကျန်းမာရေး အသုံးစားရိတ် ထဲက ၄၀၁၅ ဘတ်ထုတ်ပေးခဲ့ရပါတယ်။
ထိုင်းနိုင်ငံမှာ မြန်မာအချင်းချင်း သတ်လိုက်ရင် (သို့) တစ်ခုခုလုပ်လိုက်ရင် ဥပဒေလက်လှမ်းမမှီဘူးဆိုပြီး။ လက်လွန်ချေလွန်လုပ်တတ်ကြပါတယ်။ အခုကိစကလည်း ဘာမှမဟုတ်တဲ့ကိစ လေးကြောင့်ဖြစ်တာပါ။ တရုတ်နှစ်သစ်ကူးမှာ သူဌေးလုပ်သူက သူ့အလုပ်သမားတွေကို ၀က်ပေါ်ပြီးခွဲဝေပေးရာကနေ မကျေမနပ်ဖြစ်ပြီး စကားများ ရန်ဖြစ်ကြတာပါ။ ဓါးနဲ့အခုတ်ခံရတဲ့ ကိုဘိုလတ် (၂၅ နှစ်) နဲ့သူ့ဇနီးက ခွက်ချေး (ရာဘာချေး)ကောက် နေရတာကြောင့် ၀က်ပေါ်တော့ ၀ိုင်းမလုပ်နိုင်ခဲ့ပါဘူး။ ဒါပေမယ့် သူဌေးက ခွဲတမ်းအပြည့်ပေးပါတယ်။ ကိုဘိုလတ်ကလည်း သူရတဲ့ ၀က်သားတစ်တွဲကို သူ့မိန်းမကို ဆားနယ်ခိုင်းထားပါတယ်။ သူကတော့ သူငယ်ချင်းတွေနဲ့သူဌေးပေးတဲ့ ဘီယာသောက်ပါတယ်။ သောက်နေရင်းမမူးတဲ့ အတွက်အရက်သွားထပ်ဝယ် ပါတယ်။ အရက်ဝယ်ရင်း ၀က်ပေါ်တဲ့လူစုထဲက ကိုနိုင်ငယ်က မင်းဝက်သားဘယ်မှာလည်း ငါ့ကိုပြန်ပေးလို့ ပြောပါတယ်။ ကိုဘိုလတ်ကလည်း အိမ်မှာဆားနယ်ထားတယ် လိုချင်ရင်လိုက်ယူ ငါနောက်တစ်ခေါက်ပြန်လာ မပေးတော့ဘူး လို့ပြန်ဖြေပြီး အိမ်ပြန်လာခဲ့ပါတယ်။ ည ၉ နာရီခန့်မှာ အိမ်ကိုခဲနဲ့ပေါက်တာကြားလို့ထွက် ကြည့်ပြီး ခဲနဲ့ပေါက်သူနဲ့ စကားများရန်ဖြစ်ပြီး နပန်းလုံးနေချိန်မှာ ဘေးကတစ်ယောက်က ပါလာတဲ့ဓားနဲ့ ၀င်ခုတ် တဲ့အတွက်အခုလို ဒဏ်ရာတွေရခဲ့တာပါ။

ဓားခုတ်ခံရသူလိုပဲ ပိုက်ဆံမတတ်နိုင်လို့ ဒုကရောက်နေတဲ့ ရေနွေးပူလောင်ဒါဏ်ရာနဲ့ အသက်တစ်နှစ်ခွဲအရွယ် ကလေးလေးတစ်ယောက်ကိုလည်း ထပ်တွေ့ခဲ့ပါတယ်။ Second Degree Burn ဖြစ်ပြီး မေးဖျား၊ လည်ပင်း၊ ရင်ဘတ်၊ ၀မ်းဗိုက် နဲ့ လိင်အင်္ဂါတွေ အကုန်လုံးအပူလောင်ခြင်းကို ခံရပါတယ်။ ကလေးက အပူရှိန်အရမ်းများ နေပြီး အိပ်ပျော်ရင်းညဉ်းနေပါတယ်။ Drip သွင်းပေးထားတာတွေ့ပြီး ကလေးတစ်ကိုယ်လုံးလည်း ပတ်တီး အဖွေးသားနဲ့ပါ။ အမေဖြစ်သူက အခုလိုပြန်ပြောပြပါတယ်။ သူတို့ထမင်းစားနေတဲ့ အချိန်မှာဖြစ်တာပါတဲ့။ ထမင်းစားပြီးရင်သောက်ဖို့ဆင်အမြင့်ပေါ်မှာ အအေးခံထားတဲ့ ရေပူခွက်ကိုိုိ ကလေးက မမှီမကန်းနဲ့ လှမ်းဆွဲ ယူလိုက်တော့ သူ့ဖါသာသူ လောင်းမိသလိုဖြစ်သွားတာပါတဲ့။ (မိဘများသတိထားစရာပါ ကလေးများ အတွက် အနရာယ် ရှိနိုင်မယ့် အရာမှန်သမျှ ကလေးနဲ့မမှီအောင်ထားဖို့လိုပါတယ်။)

မှတ်ချက်

ခွက်ချေး(ရာဘာချေး) = ရာဘာစေးခြစ်ရာမှ ဘေးသို့ဖိတ်စင်သောကျပြီးခဲနေသော ရာဘာတုံးကလေးများ

ကျေးဇူးတင်ထိုက်သူများ
အရေးပေါ်အသုံးစားရိတ်များနှင့် လုပ်ပိုင်ခွင့်ပေးထားသော AJWS နှင့် GHRE
အရေးပေါ်တိုင်း မညီးမညူကားမောင်းပို့ပေးတတ်သော လုပ်အားပေးဆရာဝန်ကြီး Bob
ဘာသာပြန်အကူအညီပေးသော သမီး ၀င်းဝင်းမော်

ဇန်န၀ါရီ ၂၆

2009-01-27T00:27:00.001+07:00

"ဖန်ငမြို့ အ၀င်တစ်နေရာ"

၉း၀၀ နာရီမှ ၁၀း၀၀ နာရီထိ

အီးမေးလ် စစ်တယ်။ ကော်ဖီသောက်တယ်။ ကွန်ပျူတာထဲက ဖိုင်တစ်ချို့ ကို hard disc ထဲကို backup ပြန်လုပ် တယ်။ Movie Maker ကိုစမ်းသုံးကြည့်တယ်။

၁၀း၀၀ နာရီမှ ၁၃း၀၀ နာရီထိ
ရုံးဝန်ထမ်းတွေ အားလုံးအစည်းဝေးထိုင်တယ်။

၁၃း၀၀ နာရီမှ ၁၄း၀၀ နာရီထိ
ထမင်းစားတယ်။ အစည်းအဝေးက မကျေနပ်တာတွေ ပြန်ပွားတယ်။

၁၄း၀၀ နာရီမှ ၁၇း၀၀ နာရီထိ
ကျန်းမာရေး သင်တန်းအတွက် နှို့၊ မုန့် တွေဝယ်တယ်။ ငွေစာရင်းဌာနမှာ တပတ်စာငွေရှင်းတယ်။ ဖန်ငဆေးရုံကို လူနာကြည့်သွားဖို့ အကြောင်းဖန်လာတယ်။

၁၇း၀၀ နာရီမှ ၂၂း၀၀ နာရီထိ

မြန်မာအလုပ်သမား အချင်းချင်း ရန်ဖြစ်ပြီး ဓါးနဲ့ ခုတ်လို့ ဆေးရုံကို ရောက်တယ်။ ဆေးရုံမှာပိုက်ဆံ မရှင်းပေးနိုင်တဲ့ အတွက် ဆေးရုံက ခွဲစိတ်ခန်းထဲကို ၀င်ဖို့ဆိုင်းငန့်ထားတယ်။ နောက်တစ်ဆင့်အနေနဲ့ လက်ရှိ ကုန်ကြထားငွေ ၇၀၀၀ ဘတ်ကျော်ကို မရှင်းပေးနိုင်ရင် လူနာကို ဖမ်းခိုင်းဖို့ရဲကိုတိုင်ထားတယ်။ ညနေ ၄ နာရီလောက်မှာ ရဲကလည်း လာကြည့်သွားတယ်။ လူနာရှင်ကလည်း ကြောက်လန့်ပြီး နီးစပ်ရာ ပိုက်ဆံလိုက် ချေးရာကနေ ကျွန်တော်နဲ့ အဆက်အသွယ်ရလာတယ်။ နောက်ထပ်ကလေး တစ်ယောက်ရေနွေးပူ လောင်လို့ ဆေးရုံကို ရောက်နေတယ်။ ရင်ဘတ်၊၀မ်းဗိုက်တစ်ခုလုံးနဲ့ လိင်အင်္ဂါမှာဆိုတော့ ၅၀% ကျော်ပါတယ်။

မမေ့နိုင်သေးတဲ့ ကြေကွဲဖွယ်ဖြစ်ရပ်လေး တစ်ခု

2009-01-18T01:03:00.002+07:00

ပြီးခဲ့ပြီ ဆိုပေမယ့် မေ့မရနိုင်တဲ့ ကြေကွဲဖွယ် ဖြစ်ရပ်လေးတွေ မကြာခဏ ဆိုသလိုပေါ်လာတတ်ပါတယ်။ ပေါ်လာ တိုင်းလည်း ၀မ်းနည်းမှုဟာ မနေ့ကအတိုင်း လတ်ဆတ်နေဆဲပါပဲ။ နေ့ခင်းပိုင်း လမ်းဘေးကွမ်းပင်အောက်မှာ ကွမ်းသီးကောက်နေတဲ့ မမြင့်ကြည်နဲ့ သူငယ်ချင်းတစ်စု အနီးကို ကားတစ်စီးထိုးဆင်းလာပါတယ်။ မမြင့်ကြည် မရှောင်နိုင်တဲ့ အတွက် ကားတိုက်မိပါတယ်။ မထနိုင်တော့တဲ့အတွက် အခြားကားတစ်စီးကို အကူအညီ တောင်းပြီး ခူရဘူရီ တိုက်နယ် ဆေးရုံကို တင်ပို့ခဲ့ရပါတယ်။ တိုက်နယ် ဆေးရုံမှ လက်မခံနိုင်တဲ့ အတွက်မြို့  နယ်ဆေးရုံ တကောပါ ကိုတင်ပို့ ခဲ့ပါတယ်။ ခွဲစိပ်ခန်းနဲ့ အရေးပေါ် ဌာနမှာ တစ်ညနဲ့ တစ်နေ့နေခဲ့ရတယ်။ သတိပြန်ရလို့ စကားပြောနိုင်တဲ့ အချိန်မှာ သူလွယ်ထားတဲ့ ၅ ခန့်ရှိပြီဖြစ်တဲ့ ကိုယ်ဝန်ကို စပြီးသတိရပါတယ်။ ချုပ်ရိုးတွေပြည့်နေတဲ့ ဗိုက်ကိုစမ်းကြည့်မိပြီးတဲ့ အချိန်မှာ သတိပြန်မေ့သွားခဲ့ပါတယ်။ သူ့ရင်သွေးလေးဟာ ကားတိုက်မိတဲ့ ဒဏ်ကြောင့်သေဆုံးသွားတာကြောင့် ဆရာဝန်များက ခွဲစိတ်ထုပ်ပစ်ခဲ့ရတယ်။ လူနာမေးလာတဲ့ လူတိုင်းကို ဗိုက်လေးကိုလှန်လှန်ပြပြီး သူငိုနေတတ်ပါတယ်။
ဝမ်းဗိုက် ခွဲစိတ်ဒဏ်ရာအပြင် ဗယ်ဘက်ပေါင်မှာ ၁၂ ချက်ချုပ်ရပါတယ်။ တစ်ကိုယ်လုံး သွေးချည်ဥ ညိုမဲစွဲ ဒဏ်ရာတွေ ရရှိခဲ့ပါတယ်။ ရင်သွေးလည်း ဆုံးရှုံး လူလည်းဒဏ်ရာများနဲ့ ဆေးရုံမှာ ၂ ပတ်ကျော်ကြာ နေခဲ့ရပေ မယ့် မပြီးသေးပါဘူး။ ငွေကြေးကုန်ကျမှု မတတ်နိုင်တဲ့ အတွက် ဆေးရုံ တာဝန်ရှိသူများရဲ့ နေ့စဉ်နဲ့ အမျှ ဆူပူမှုကို ခံနေရပါတယ်။ ကားနဲ့ ၀င်တိုက်ခဲ့တဲ့ ကားအမောင်းသင် အမျိုးသမီးကတော့ သူမဟုတ်သလိုနေနိုင်ခဲ့ပါတယ်။ မမြင့်ကြည်ရဲ့ သူဌေး ညှိုနှိုင်းဆောင်ရွက်ပေးတာက ၅၀၀၀၀ ဘတ်ကျော် ကုန်ကြမယ့်ဆေးဖိုးဝါးခအတွက် ၇၀၀၀ ဘတ်ထုတ်ပေးခဲ့ပြီး နောက်ပေါ်မလာတော့ပါဘူး။ အဖွဲ့အစည်း အနေနဲ့ ကြားဝင်ပေးဖို့ ကမ်းလှမ်းတဲ့ အခါ မမြင့်ကြည် ရဲ့ အမျိုးသားက ရေရှည်အတွက်ဆိုပြီး ခေါင်းခါပါတယ်။ ဒီတော့လည်းမတတ်နိုင်ပါဘူး။ လျှော်ကြေး ပေးတဲ့ ၇၀၀၀ ဘတ်ရယ် လူနာရှင်က ၈၀၀၀ ဘတ်ရယ် ကျွန်တော့် ကျန်းမာရေးဌာန အရေးပေါ်အသုံးစားရိတ် ၁၀၀၀၀ ဘတ် ပေါင်း ၂၅၀၀၀ ဘတ်ကိုင်ပြီး လူမှုဖူလုံရေး ရုံးခန်းကို မျက်နှာငယ်နဲ့ သွားရပါတယ်။ ၅၀၀၀၀ ဘတ်ကုန်ကြစားရိတ်ကို ၂၅၀၀၀ ဘတ် သာပေးနိုင်တဲ့ အတွက် အချိန်တော်တော် ကြာကြာ ဆူပူမှုကိုလည်း ခဲ့ယူခဲ့ရပါတယ်။ ပြီးသွားခဲ့ ပြီဆိုပေမယ့် မမေ့နိုင်သေးတဲ့ အဖြစ်အပျက်တွေထဲက ဖြစ်ရပ်တစ်ခုပါပဲ။

အွန်လိုင်း လက်ဆောင်

2009-01-09T00:23:00.003+07:00

မြန်မာတို့ဆိုရိုးစကားရှိတယ် မဟုတ်လား။ "ကွယ်ရင်မေ့ တွေ့သေအောင်လွမ်းတယ်" ဆိုတာလေ၊ အဲဒီဆိုရိုးများ ကျွန်တော်နဲ့ လိုက်ဖက်ညီမယ်ထင်တယ်။ သူငယ်ချင်းတွေ များလည်း အဲလိုပဲပြောကြတာပါပဲ။ ဒါပေမယ့် အဲဒါ ၂၀၀၈ မှာကျန်ခဲ့တယ်သိလား။ လူကိုခင်လို့ မူကိုပြင်လိုက်တာလေ။ ဘယ်သူ့ခင်တယ်မှတ်လည်း ကိုယ့်ဖါသာ ကိုယ်ခင်တာ။ ၂၀၀၉ အစမှာ ဘာလုပ်တယ်မှတ်လည်း ဂျီတော့မှာ တွေ့သမျှသူငယ်ချင်းတွေ ကိုယ်ကအရင် နှုတ်ဆက်တယ် ၊ ပြီးရင်နှစ်သစ်လက်ဆောင်တောင်းတယ်။ ဖုန်းထဲမှာ ရှိတဲ့ သူငယ်ချင်းများ အားလုံးကို ကိုယ်ကအရင်ဖုန်းခေါ်တယ်။ အွန်လိုင်းပေါ်တတ်ခိုင်းတယ် ပြီးရင်လက်ဆောင် တောင်းတယ်။ တစ်ချို့ ကလည်း ကြည်ကြည်ဖြူဖြူ ပေးကြတယ်။ တစ်ချို့ ကလည်း မေတ္တာပို့တယ်။ ဘာပဲဖြစ်ဖြစ်လက်ဆောင်တော့ ရတာပေါ့။ ကျွန်တော် များ အဲဒါနဲ့ မကျေနပ်နိုင် သူငယ်ချင်းရဲ့ သူငယ်ချင်းများကိုပါ အတင်းလက်ဆောင်လိုက် တောင်းခိုင်းတယ်။ ညီလေးတွေဖြစ်တဲ့ ကျော်သက်သွေး နဲ့ နံနက်ခင်းကဗျာ တို့ဆိုရင်သူတို့ရဲ့ ဂျီတော့ မက်ဆေ့ခ်ျ မှာတောင် လင့်နဲ့ကြေညာပေး ရတဲ့ အဆင့်ထိရောက်ကုန်တယ် ဟီး...ဟီး...။

သူငယ်ချင်းအရင်း ခေါက်ခေါက် Southern Migrant နဲ့ ဗန်ကို တို့များမပေးဘူးခေါင်းမာတယ်။ ကျေးဇူးတင်တယ်တဲ့ ကောင်းကင်ကိုကို မဲပေးခွင့်ရလို့တဲ့၊ ငါ့ကျတော့မပေးဘူးပြောတော့ သူက ကဗျာရေးတာ ကောင်းတယ်တဲ့။ ကျွန်တော်ဘာလုပ်တယ် မှတ်လည်း "အိမ်ရှင်" ကဗျာလင့်ကိုပေးပြီး ကောင်းကင်ကို လာဖတ်တဲ့ငါ့ကဗျာ ဆိုတော့မှ တစ်ယောက် တစ်မဲထွက်လာတယ် ဟူး....မောလိုက်တာ။ အဲဒီလက်ဆောင် တောင်းတဲ့ကိစ္စက ထိုင်းနိုင်ငံတောင်ပိုင်း ဖန်ငခရိုင်တင်မပြီးဘူး ချင်းမိုင်၊ ဘန်ကောက်၊ မဲဆောက်ထိုင်းနိုင်ငံ တစ်နိုင်ငံလုံးက သူငယ်ချင်းတွေကုန်သွားတယ်။ အဲဒီမှာ စတွေ့တာလေ မဲကလည်းမပိတ်သေးဘူး နှစ်ရက်ကြီးများ တောင် ကျန်သေးတယ်။ အဲဒါနဲ့ဒီပို့စ် ရေးပြီး စာလာဖတ်တဲ့ ဘလောက်ဂါသူငယ်ချင်းတွေကို နှစ်သစ်ကူး လက်ဆောင် တောင်းတာ ဖတ်ပြီးရင် လက်ဆောင် ပေးကြနော်။

့Myanmar Blog Academy Award ရဲ့ Home Page နော်
လက်ဆောင်ပေးဖို့လင့်က ဒီမှာ အကောင်းဆုံး ပရဟိတ ဘလော့ဂ်ဆုအောက်မှာ ပိုကောင်းမယ့် မနက်ဖြန်နော် ဟီး...။ မြန်မြန်ပေးနော် နှစ်ရက်ပဲကျန်တော့တယ် ၁၀ရက်နေ့ မြန်မာစံတော်ချိန် ည ၁၂ နာရီဆို လက်ဆောင် ပေးမရတော့ဘူး။

2008 weblog awards ရဲ့ Home Page
နောက်တစ်ခုကတို့ ဘုန်းဘုန်း အရှင်မေတာစာရ (Ashin Matacara) ကိုလည်း လက်ဆောင်ပေးကြအုံးနော်။ လင့်ကဒီမှာ တို့ ဘုန်းဘုန်းကိုလည်း လက်ဆောင်မြန်မြန်နဲ့ များများပေးကြအုံးနော်။

စားဝတ်နေရေး ပြသာနာ

2009-01-08T01:21:00.001+07:00

ဒီရက်ထဲမှာစိတ်ခံစားချက်တွေ သိပ်မကောင်းဘူးဖြစ်နေတယ်။ ကိုယ်စောင့်ရှောက်နေရတဲ့ နာတာရှည် (အေအိုင်ဒီအက်စ်နဲ့ တီဘီ) လူနာတစ်ချို့ ရဲ့ ကျမ်းမာရေး အခြေအနေတိုးတက်မှုမရှိတဲ့ ဘက်ကများနေတယ်။ တစ်ချို့ လူနာ ဆိုရင် တစ်ပါတ် ထဲမှာတင်ဆေးရုံကို အတက်အဆင်း ၃ခါလောက်လုပ်နေရတယ်။ Temporary Shelter မှာလည်း လူနာတွေအတွက် အခန်းတွေပြည့်နေပြီ AIDS နဲ့ TB ရောဂါသည်တွေ နှစ်ကုန်ပိုင်းမှာ တိုးလာတယ်။ နယ်စည်းမခြားဆရာဝန်များအဖွဲ့ကနေပြီး လူနာတွေအပန်းဖြေဖို့ ဆောက်ထားတဲ့ TV/ DVD ထားဖို့နေရာလည်း လူနာတွေနဲ့ပြည့်ကုန်ပြီ။

လူနာတွေအတွက် စားရေးသောက်ရေးအတွက်လည်း ပူပင်လာရတယ်။ အရင်က နယ်စည်းမခြားဆရာဝန်များ အဖွဲ့က - အေအိုင်ဒီအက် လူနာတစ်ယောက်အတွက် ၁ လကို ဆန် ၁၀ ကီလို၊ ဆီ ၂ ဗူး၊ ကြက်ဥ ၊ ခေါက်ဆွဲခြောက်၊ငါးသေတာတွေထောက်ပံ့ရာကနေဇန်န၀ါရီလက စလို့ တစ်ချို့  ပြန်လည်ကျန်းမာလာပြီ ဖြစ် တဲ့ လူနာတွေကို ရိကာ တွေကိုလျော့ချမယ် ဆိုတော့ တစ်ချို့ လူနာတွေက စိတ်ဓာတ်ကျပြီး ဆေးတွေကိုလွှတ်ပစ်ဖို့၊ ရပ်ပစ်ဖို့လုပ်လာကြတယ်။ မိမိတို့အဖွဲ့အနေကလည်း လူနာတစ်ယောက်ကို တစ်နေ့ ၃၀ ဘတ်ထက်ပိုပြီး အကုန်အကျ မခံနိုင်တော့ လူနာတွေကိုသနားမိတယ်။ တစ်ချို့ ထမင်းမစားနိုင်တဲ့ လူနာတွေဆို အာဟာရ တွေလိုအပ်တယ် ကိုယ်ပိုင်အလှူဖြစ်တဲ့ နို့၊ သီးစုံဖျော်ရည်တို့ ကိုလည်း လူနာများလာတော့ မတတ် နိုင်ဖြစ်ရတယ်။ NGOs အဖွဲ့တွေအနေနဲ့ လည်းအကောင်းဆုံးဖြစ်အောင်တော့ စီစဉ်ပေးနိုင်မယ်လို့ပဲ မျှော်လင့်ရင်း ဆုတောင်းရမှာပါပဲ။

မိနွယ်အကြောင်း တစ်စေ့တစ်စောင်း

2009-01-06T01:45:00.002+07:00

အလှူရှင်တစ်ယောက်နဲ့ချိန်းထားတဲ့ အတွက်ခူရဘူရီ စာသင် ကျောင်းကို ကျမ်းမာရေးပညာပေး သွားရမှာ ဖြစ် ပေမယ့်၊ခရီး စဉ်ကိုဖျက်သိမ်းခဲ့တယ်။မနက်(၉း၀၀)နာရီရုံးရောက်ကတည်း က ဖုန်းကိုစောင့်မျှော်မိတယ်။ ညနေရုံးဆင်းချိန်ထိဖုန်းမလာ။ စိတ်လည်းမော လူလည်းမော ကျန်းမာရေးပညာပေး ခရီးစဉ် လည်းပျက်ခဲ့ ရတယ်။ မိနွယ်အတွက်လည်း စိတ်မကောင်းဖြစ် မိတယ်။ မိနွယ်ကို ကျွန်တော်စတွေ့တော့၁၁ နှစ်သမီး၊ သူ့ခဗျာ အခြေခံပညာလေး တောင်မ တတ်ဖြစ်နေတယ်။ လူကြား ထဲသွားရမှာကိုရှက်နေတော့ လည်းခက်တယ်။ အကြောင်းက သူ ၃ နှစ်သမီးအရွယ် ထိုင်းနိုင်ငံ ရနောင်းမြို့  မှာ ၀မ်းဗိုက်ဘာဖြစ်တယ်မသိ (ဆေးမှတ်တမ်းလည်း မရှိ၊ မိဘများကလည်း သေချာပြန်မပြောပြနိုင်) စအိုမှဝမ်းသွား ခြင်း မဟုတ်ပဲ ၀မ်းဗိုက်တွင်ဖေါက်ပြီး ၀မ်းသွားခိုင်းထားတယ်။ ၀မ်းသွားလမ်းကြောင်းလွှဲထားတယ်ပေ့ါ။ သုံးနှစ်ခန့်ကြာလျှင်ပြန်လာရန် ဆရာဝန်များမှ မှာကြားပြီး ပြန်လွှတ်လိုက်တယ်။ မိဘများမှ မသွားနိုင်ဖြစ်ခဲ့တယ်။ ဒီထက်ဆိုး သည်က မိဘများက ဆေးမှတ်တမ်းများကို ဂရုတစိုက်သိမ်းထားရမှန်းမသိ ပျောက်ကုန်တယ်။

ကျွန်တော် လုပ်ပေးနိုင်တဲ့အပိုင်းက တတ်နိုင်သမျှ ကိုအကူပေးထားတယ်။ အနီးအနားက ဆေးရုံတင်မက ဖူးကတ်ဆေးရုံကြီးထိ ကလေးကိုခေါ်ပြီး ဆရာဝန်နဲ့ပြတယ်။ ဆရာဝန်က နှစ်ခေါက်ပြန်ချိန်းတယ်။ ဓာတ်မုန်ရိုက် တယ်။ လုံလောက်တဲ့ ရောဂါရာဇ၀င်ရှာမတွေ့ ခြင်းကြောင့်လားမသိ အရင်ဆေးမှတ်တမ်းများကို ရနောင်း ဆေးရုံကြီးမှာရှာခိုင်းတယ်။ ရနောင်းဆေးရုံကြီးထိ သွားရှာသော်လည်းပဲ လွန်ခဲ့သော ၇ နှစ်ကျော်ခန့်က မြန်မာ ကလေးတစ်ယောက်ရဲ့ ဆေးမှတ်တမ်းက အစရှာမရ။

(ဖူးကတ်ဆေးရုံ ဓာတ်မုန်ဌာန ရှေ့ မှ မိနွယ်)

ဖူးကတ်ဆေးရုံကိုနောက်တစ်ခေါက်ပြန်သွားတယ်။ ဆရာဝန်က လက်မခံ စူရတ်ဌာနီဆေးရုံကို ထပ်မံလွှဲပြန် တယ်။ ကျွန်တော်ရဲ့ ကြိုးစားမှုတွေ ခြေကုန်လက်ပန်း ကြကုန်တယ်။ ပြီးခဲ့တဲ့ အပတ်က အမေရိကားကို ခဏရောက်နေတဲ့ ညီမလေးတစ်ယောက်က အလှူရှင် တစ်ယောက်နဲ့ ဆက်သွယ်ပေးမယ်။ အစ်ကိုဖုန်းနံပါတ် ကိုပေးလိုက်မယ်။ အမြန်စီစဉ်ပါတဲ့ သူနှစ်ပါတ်ပဲ ထိုင်းနိုင်ငံမှာ နေမှာဆိုတဲ့ ကိုယ်လည်း စီစဉ်သင့်တာတွေ စီစဉ်တယ်။ ဟိုဘက်ကဖုန်းမဆက်လာ။ ဒီတစ်ခါကော မိနွယ်လေးအတွက် ဘယ်လိုရှိမလည်းမသိ။ အိပ်ယာ ထဲရောက်ပြီးမှ အိပ်မပျော် ဒီစာကိုကောက်ရေးတယ်။ မိနွယ်လေးဘ၀ အစဉ်ပြေစေဖို့ဆု တောင်းပေးပါတယ်။

ဆင်းသူဆင်းလို့ တက်သူတက်

2009-01-03T02:31:00.001+07:00

ကျန်းမာရေးဝန်ထမ်း ဘ၀မှာအားလပ်ရက်ဆိုတာ နည်းပါးလှပါတယ်။ ဒီနေ့လည်း တီဘီလူနာတစ်ယောက် ကျန်းမာရေး အခြေအနေပြန်လည် ဆိုးရွားလာတာကြောင့် ဆေးရုံကို အရေးပေါ်ပို့ပေးခဲ့ရပါတယ်။ အပြန်မှာ ဆေးရုံမှာ ရက်လေးဆယ်ကျော်နေတဲ့ အေအိုင်ဒီအက်စ် ရောဂါသည် ညီငယ်လေးတစ်ယောက်ကို ဆေးရုံက ဆင်းခိုင်းနေတာကြောင့် ပြန်ကြိုလာခဲ့ပါတယ်။ ယာယီခိုလှုံသူများနေထိုင်ရာတန်းလျားမှာ အခန်းစီစဉ်ပေးရ ပါတယ်။ အင်း..... အသစ်ထပ်တိုးလာတဲ့ဝေဒနာရှင် တစ်ယောက်ပေါ့။
ကျွန်တော်တို့ရဲ့ မြန်မာရွှေ့ ပြောင်းအလုပ်သမားများဟာ ဆေးအရှိန်ဒဏ်ကို မခံနိုင်လို့ ကိုယ့်ဖါသာ ဆုံးဖြတ်ပြီး ရပ်ပစ်လိုက်တာတွေရှိပါတယ်။ ဒါကိုအတူနေသူ များကလည်း လိုက်လျောတတ်ကြပါတယ်။ ဆေးယဉ်ပါးတဲ့ တီဘီပိုး ကူးစက်ပြန့်နှံ့ရတဲ့အကြောင်းအရင်းတစ်ချက်လည်းပဲ ဖြစ်ပါတယ်။ ဒီထက်ပိုဆိုးတာက သေသေချာချာ တတ်ကျွမ်းခြင်းမရှိသူများနဲ့ တိုင်ပင်ပြီး ဆေးမှီးတိုတွေနဲ့ ရမ်းကုသတတ်ပြန်ပါသေးတယ်။ လည်ပင်းမှာ ထွက်လာတဲ့ တီဘီအကြိတ်တွေကိုလည်း ပြည်ရှိတယ်ဆိုပြီး သန့်ရှင်းမှုမရှိတဲ့ အခန်းမှာပဲ ခွဲထုတ်ကြပါတယ်။ ကျွန်တော်နဲ့တွေ့တော့ လည်ပင်းတစ်ခုလုံးနည်းပါး ပြည်တွေတည်နေပြီး လူနာလည်းပဲ လမ်းတောင် ကောင်းကောင်းမလျှောက်နိုင်တော့တာကြောင့် နယ်စည်းမခြားဆရာဝန်များအဖွဲ့ကိုဆေးဝါးကုန်ကြ စားရိတ် အကူအညီတောင်းပြီး ဆေးရုံကိုတင်ပို့ပေးခဲ့ရပါတယ်။

အေအိုင်ဒီအက်စ် လူနာညီလေးကိုကြည့်တော့လည်း အသက်က ၂၅ လောက်ပဲရှိပါသေးတယ်။ ဘယ် အသက်အရွယ်လောက် ကတည်းက သူရောဂါပိုးကူးစက်ခြင်းကိုခံထားရသလဲဆိုတာ မခန့်မှန်းတတ် သလောက် ပါပဲ။ ထိုင်းနိုင်ငံနဲ့ နယ်စပ်ခြင်းနီးကပ်တဲ့ နယ်မြေကလူတွေက အရွယ်မတိုင်မှီကလေးဘ၀ကတည်းက ထိုင်းနိုင်ငံဘက်မှာ အလုပ်လာလုပ်နေကြပါပြီ။ တရားမ၀င်ကလေးအလုပ်သမားနှုန်း တွေမြင့်တက်နေတာဟာ အိပ်အိုင်ဗွီ၊ အေအိုင်ဒီအက် ကူးစက်နှုန်းပြန့်ပွါးမှုနဲ့ စပ်စပ်နေတယ်ဆိုတာ အတွေ့အကြုံအရပြောရဲပါတယ်။ အနာဂတ် အရေးကို စိတ်လေးမိပါတယ်။ ပထမအကြိမ်သွေးစစ်ချက်အဖြေအရ ဇနီးသည်မှာ တော့မတွေ့သေး ပါဘူး။ နောက်သုံးလ သို့ ခြောက်လ တစ်ကြိမ်ပြန်စစ်လျှင်တော့ မတွေ့ပါစေနဲ့လို့ပဲ ဆုတောင်းပေးရတော့မှာပေါ့။

နေ့သစ်အတွက် နှစ်သစ်ဆုတောင်း

2008-12-31T22:49:00.007+07:00

မင်္ဂလာရှိသောနှစ်သစ်ပါလို့ နှုတ်ဆက်နေရင်းနေ့သစ်ကိုသွားသတိရမိပါတယ်။ နေ့သစ်အဖွဲ့သားများ အားလုံး စိတ်၏ချမ်းသာခြင်းကိုယ်၏ကျန်းမာခြင်းနဲ့ပြည့်စုံပြီး အရာအားလုံးကိုရင်ဆိုင်ကျော်လွှားနိုင်ပါစေလို့ဆုမွန်ကောင်း တောင်းမှုပြုအပ်ပါတယ်။ နေ့သစ်ဆိုတာ ထိုင်းနိုင်ငံတောင်ပိုင်းမှာ လွန်ခဲ့တဲ့ ၂ နှစ် ၂၀၀၇ အောက်တိုဘာလ မှာဖွဲ့စည်းခဲ့တဲ့အဖွဲ့လေးတစ်ခုပါ။ အသင်းဝင်ပေါင်း ၂၇ ဦးရှိပါတယ်။ အသင်းဝင်အများစုဟာ အိပ်ခ်ျအိုင်ဗီ/ အေအိုင်ဒီအက်စ် ရောဂါပိုးကူး စက်ခံထားသူများဖြစ်ပါတယ်။ ဒီလိုပြောလို့ အသင်းဝင် ၂၀ ကျော် သာရှိတယ်လို့ ထင်မြင်စရာဖြစ်နိုင်ပါတယ်။ နယ်စည်းမခြားဆရာဝန်များ အဖွဲ့ (ဘယ်လ်ဂျီယံ)ရဲ့ စစ်တမ်းအရ မြန်မာရွှေ့ ပြောင်းအလုပ်သမား ကိုယ်ဝန်ဆောင်သည် ၂၅ ဦးမှာ အိပ်ခ်ျအိုင်ဗီပိုး ကူးစက်ခံ ထားရသူ ၁ ဦးရှိနေပါတယ်။ ၁၀၀ မှာ ၄ ဦးနှုန်း၊ ကိုယ်ဝန်ဆောင်သည်များရဲ့ အမျိုးသားများကိုပါထည့် တွက်မယ်ဆိုရင် ၁၀၀ မှာ ၈ ဦးနှုန်းပါ။ ဒါကလည်းပဲ လိင်ဆက်ဆံဖော် နည်းပြီး တလင်တမယား စနစ်ကျင့်သုံး သူများအတွက်ပုံသေတွက်နှုန်းပါ။ တလင်တမယားစနစ်မဟုတ်ပဲ ဖောက်ပြန်မှုတွေသာ ရှိနေမယ် ဆိုရင် ကူးစက် နိုင်မှုရာခိုင်နှုန်းဟာ အတက်ဘက်မှာ ပဲရှိပါတယ်။
ဖန်ငခရိုင်လူဝင်မှုကြီးကြပ်ရေးရုံးမှ တာဝန်ရှိသူများ သုံးသပ်ထုပ်ပြန်ချက် အရ ဖန်ငခရိုင်မှာ အလုပ်သမား တစ်သိန်းကျော်အထက်မှာ ရှိပါတယ်။ တစ်ရာ(၁၀၀) မှာ ရှစ် (၈) ယောက်နှုန်းသာ အိပ်ခ်ျအိုင်ဗီ ကူးစက်ပျံ့နှံ့ ခြင်း ကိုခံနေရတယ်ဆိုရင် တစ်ထောင် (၁၀၀၀) မှာ ရှစ်ဆယ် (၈၀) ဦး တစ်သောင်း (၁၀၀၀၀) မှာ ရှစ်ရာ (၈၀၀) ဦး တစ်သိန်း (၁၀၀၀၀၀) မှာ ရှစ်ထောင် (၈၀၀၀) ဦးဟာ အိပ်ခ်ျအိုင်ဗီပိုး ကူးစက်ခြင်းကို ခံနေရဖွယ်ရှိပါတယ်။ ဒါဆိုရင်ဖန်ငခရိုင်ရောက် ရွှေ့ ပြောင်းမြန်မာ အလုပ်သမား တစ်သိန်းမှာ ရှစ်ထောင် (၈၀၀၀) ကျော်ဟာ အိပ်ခ်ျအိုင်ဗီပိုး ကူးစက်ပျံ့ ပွားခြင်းဒဏ် ကိုခံထားနေရပါပြီ။ ဖန်ငခရိုင် လူထုကျန်းမာရေး ပညာပေးဌာန နဲ့ ဇူလိုင်လမှာ ပူးတွဲ ကျင်းပတဲ့ကျန်းမာရေးပညာပေးဆွေးနွေးပွဲအရ ကိုယ်ဝန်ဆောင်သည် ဆယ်ဦးမှာတစ်ဦးသာ အေအာဗွီ ဆေးဝါး လက်ခံ ရရှိပါတယ်တဲ့ ပိုလို့သာဆိုးဝါးလာဖို့ရှိပါတယ်။ ကျွန်တော်စောင့်ရှောက်နေတဲ့ လူနာဦးရေဟာလည်း တစ်နေ့တစ်ခြားတိုးလာနေပါတယ်။ အမျိုးသမီး ၃ ဦး အမျိုးသား ၈ ဦးနဲ့စုစုပေါင်း ၁၁ ဦးရှိလာနေပါတယ်။ ကျွန်တော့်အတွေ့အကြုံအရ တီဘီ ရောဂါသည် ၅ ဦးကို သွေးဖောက်စစ်ကြည့်ရင် ၃ ဦးဟာ အိပ်ခ်ျအိုင်ဗွီပိုး ကူးစက်ခြင်းခံထား ရသူတွေဖြစ်နေပါတယ်။ အိပ်ခ်ျအိုင်ဗွီ နဲ့ တီဘီရောဂါ ဆက်နွယ်နေတယ် ဆိုတာကို လည်း ထင်ရှားစေပါတယ်။

တီဘီရောဂါဘက်ကိုပြန်ကြည့် မယ်ဆိုပြန်တော့လည်း ပိုးအသစ်ကူးစက်ခြင်းခံရတဲ့ တီဘီထက် ဆေးယဉ်ပါး တဲ့တီဘီရောဂါပိုးခံစားရသူ ဦးရေကိုပိုတွေ့ရပါတယ်။ ဘယ်လိုအကြောင်းတွေက ဆေးယဉ်ပါးတဲ့ တီဘီရောဂါ ပိုး ကိုဖြစ်စေနိုင်သလည်း ဆိုတာသေသေချာချာ မသိရပါဘူး။ ကိုထွန်း ရဲ့အဖြစ်အပျက်ကို ကြည့်မယ်ဆိုရင် ဆေးသောက်ပြီး ငါးလအကြာမှာ သူဌေးခေါ်ဆောင်မှုကြောင့် လှေပြန်ထွက်ခဲ့ပါတယ်။ ဆေးကုန်ချိန်မှာ ကမ်းမကပ်နိုင်ခဲ့တဲ့အတွက် ဆေးပြတ်ခဲ့ရပါတယ်။ ရောဂါပြန်ထပြီး အခြေအနေဆိုးရွားချိန်မှာ မှ ပြန်တွေ့ဆုံခဲ့တာ ပါ။ အဲဒီအကြောင်းတရားကပဲ သူ့အသက်ကိုနှုတ်ယူသွားခဲ့ပါတယ်။

ရင်ထဲမှာ ထိခိုက်ခြင်းများစွာနဲ့ ပဲနှစ်တစ်နှစ်ကို ဖြတ်သန်းခဲ့ရပြီးပါပြီ။ ၂၀၀၉ မှာကောဘယ်လို အဖြစ်ဆိုးမျိုးတွေကိုထပ်မံကြုံတွေ့ရမယ်ဆိုတာ မခန့်မှန်းနိုင်ပါဘူး အကျိုးတရားပေါင်းများစွာနဲ့ သက်ဆိုင်နေပါ လိမ့်မယ်။ သူတို့တွေအပေါ်မှာ အကြင်တရားများနဲ့ နားလည်ဖေးကူနိုင်သူများနဲ့တွေ့ဆုံမှသာလျှင်......။

ပြေးသူပြေး လဲသူလဲတဲ့ ကျန်းမာရေးပညာပေးဆွေးနွေးပွဲ

2008-12-28T23:33:00.006+07:00

တနင်္ဂနွေနေ့မို့ အလုပ်သမားတစ်ချို့  အလုပ်နားကြတယ်။ အဲဒီနေ့ရက်တွေမှာ ကျွန်တော့်အတွက်တော့ အလုပ် သမားများကို ကျန်းမာရေးပညာပေးဖြစ်ပါတယ်။ ဒီနေ့လည်း ကမ်းခြေနားက ပန်းရံဆိုက်တစ်ခုမှာ ကျန်းမာရေး ပညာပေးဖြစ်ပါတယ်။ တစ်ချို့ သားသမီးတွေနဲ့ သားအိမ်ပုံ ဘယ်လိုရှိတယ် မသိပါဘူး။ ကတ်ကြေးနဲ့ ကိုက်ထားတဲ့သားအိမ်ပုံကို ပြန်ဆက်နိုင်ဖို့ ၁၀ မိနစ်ခန့် အလွဲလွဲအမှားမှား ဖြစ်ခဲ့ပါတယ်။ ( အလုပ်သမားများရဲ့ ကျန်းမာရေးဗဟုသုတကို သိစေချင်လို့ပါ။) အမျိုးသမီးသမီးများရဲ့ သားအိမ်ဖွဲ့စည်းတည်ဆောက်ပုံနဲ့ လုပ်ငန်းစဉ်တွေ ရာသီစက်ဝန်း အကြောင်းကိုအဓိကထားဆွေးနွေးပေမယ့်။ ကိုယ်ဝန်ဆောင်မိခင် သုံးဦး ဆွေးနွေးပွဲတတ်ရောက်လာတာကြောင့် ကိုယ်ဝန်ဆောင်မိခင်စောင့်ရှောက်ခြင်းအကြောင်းကို အနည်းငယ် ထပ်ရှင်းပြဖြစ်ပါတယ်။ ရုပ်ပန်းချီကားချပ်များနဲ့ ရှင်းပြတာကြောင့် အမျိုးသမီး ၁၆ ဦးအပြင် အခြားသူများပါ ၀ိုင်းဆွေးနွေးတာကြောင့် မထင်မှတ်ပဲ စည်ကားသွားပါတယ်။ အပြန်အလှန်ဆွေးနွေးပွဲကို ၁ နာရီခန့်အကြာမှာ အဆုံးသတ်ခဲ့ပါတယ်။

အချိန်အနည်းငယ်ရသေးတာကြောင့် လူမှုရေးစီးပွားရေး အကြောင်းကို ပန်းရံလုပ်သားကြီးအချို့ နဲ့ စကားစမြည် ပြောဖြစ်ပါတယ်။ အလုပ်သမားကဒ် (ဘတ်) မရှိတာကြောင့် ညဘက်တွေမှာ တန်းလျားမှာ မအိပ်ရဲလို့ တောထဲမှာ အိပ်နေရကြောင်းသိရပါတယ်။ ကလေးတွေ၊ သားသည်မိခင်တွေနဲ့ ကိုယ်ဝန်ဆောင်သည်တွေ အတွက်စိုးရိမ်ကြောင်းလည်း ပြောပြပါတယ်။ စီးပွားရေးအနေနဲ့တော့ နှစ်ကုန်ရင် အလုပ်တွေ ရပ်တော့ မယ်လို့သိရပါတယ်။ တစ်ချို့ လည်း အခြားနေရာတွေပြောင်းရွှေ့ အလုပ်လုပ်ကိုင် နေပြီဖြစ်ကြောင်းသိရပါတယ်။ စကားမဆုံးခင်မှာပဲလူတွေ တ၀ုန်းဝုန်းထပြေးပါတယ် ရုတ်တရက်လန့်သွားပါတယ်။ သေချာမေးကြည့် တော့မှရုံးကလာကြိုတဲ့ကားကို ရဲကားအမှတ်နဲ့ ပြေးကြတာပါတဲ့။ တော်တော်လေးကို အားလည်းနာပြီး စိတ်မကောင်းလည်းဖြစ်မိပါတယ်။ သူတို့နေ့စဉ်ဒီလိုပြေးနေရတာကို လည်းကိုယ်ချင်းစာမိပါတယ်။ ဒီလိုအဖြစ် တွေ ဘယ်အချိန်အဆုံးသတ်မလည်း ဆိုတာ အဖြေမရှိသေးပါဘူး။

ညှိုးနွမ်းကြယ်

2008-12-28T00:24:00.004+07:00

ဆူနာမီ လေးနှစ်ပြည့်နှစ်ပတ်လည် အခမ်းအနားမှာ ဓာတ်ပုံမှတ်တမ်းယူဖို့ ပြင်ဆင်နေတဲ့ InSightOut ရုံးကို ကလေးတွေ လိုက်ပို့ရင်းနဲ့ရောက်သွားတယ်။ ကင်မရာအားလုံးကို ပြန်စစ်၊ သန့်ရှင်း၊ ဘက်ထရီဖြည့်တာ တွေကြည့်ရင်း ခေါင်းနောက်လာတယ်။ စာအုပ်စင်မှာ ညှိုးနွမ်းကြယ် ဆိုတဲ့ မြန်မာ၊ အင်္ဂလိပ်၊ ဂျပန်သုံးဘာသာနဲ့ ရေးထိုးထားတဲ့ ဓာတ်ပုံစာအုပ်တွေ့တာနဲ့ လှန်ကြည့်ရင်း အမျိုးမျိုးသော ခံစားမှုကို ပေးတာကြောင့် မျှဝေတာပါ။ ကျွန်တော်ကိုင်တဲ့ကင်မရာ 6.0 mega pixels ပဲရှိတာပါ အတတ်နိုင်ဆုံးနဲ့ အကောင်းဆုံးဖြစ်အောင် စာအုပ်ထဲက ပုံတွေကို ပြန်လည်ဓာတ်ပုံရိုက်ယူခဲ့တာပါ။ မူရင်းရိုက်ကူးသူ ကတော့ ဂျပန်လူမျိုးပါ။ ညှိုးနွမ်းကြယ် စာအုပ်မှ ဓာတ်ပုံများကို ဒီနေရာမှာ သွားကြည့်နိုင် ပါတယ်။

ဝမ်းနည်းကြေကွဲခြင်း

2008-12-24T00:09:00.006+07:00

ဘလောက်ဂါ ကိုမျိုးချစ်မြန်မာ၏ ဖခင်ဦးနောင်ထွန်းလွင်(ခ) ဦးထွန်းထွန်းနိုင်ကွယ်လွန်သွားကြောင်း သိရပါသဖြင့် ကိုမျိုးချစ်မြန်မာနှင့်အတူ ထပ်တူထပ်မျှဝမ်းနည်းကြေကွဲရပါသည်။

နှစ် ၆၀ ပြည့် အပြည်ပြည်ဆိုင်ရာ လူ့အခွင့်အရေးနေ့ သဘောထားထုတ် ပြန်ကြေညာချက်

2008-12-14T02:53:00.004+07:00

မြန်မာပြည်လွတ်မြောက်ရေးအဖွဲ့ချုပ်အနေဖြင့် နအဖ ၏ လူ့အခွင့်အရေးချိုးဖေါက်မှုများနှင့် တိုင်းပြည်ကို တရားဝင် စစ်ကျွန်ပြုရေး လုပ်ငန်းစဉ်များကို ပြင်းထန်စွာ ကန့် ကွက်ရှုံ့ချကြောင်း အနှစ် ၆၀ မြောက် အပြည်ပြည်ဆိုင်ရာ လူ့အခွင့်အရေးနေ့ တွင် ကြေငြာ အပ်ပါသည်။
ဗိုလ်သန်းရွှေ ဦးဆောင်သည့် န၀တ တဖြစ်လဲ နအဖ စစ်အုပ်စုတို့ သည် မိမိတို့  အာဏာတည်မြဲရေးနှင့် တိုင်းပြည်ကိုတရားဝင်စစ်ကျွန်ပြုရန် အလို့ ငှာ ပရမ်းပတာ ဖမ်းဆီးချုပ်နှောင်ခြင်း၊ ဒေါ်အောင်ဆန်းစုကြည်နှင့် နိုင်ငံရေး ခေါင်းဆောင်များ၊ ကိုမင်းကိုနိုင်နှင့်တကွ (၈၈)မျိုးဆက်ကျောင်းသားခေါင်းဆောင်များ၊ လူ့အခွင့်အရေး လှုပ်ရှားသူများကို နစ်ရှည်ထောင်ဒဏ်များ ချမှတ်ခြင်း၊ ညှင်းပမ်းနှိပ်စက်ခြင်း၊ ပေါ်တာဆွဲခြင်း၊ အတင်းအဓမ္မ လုပ်အားပေးစေခိုင်းခြင်း၊ နယ်စပ်ဒေသမှ တိုင်းရင်းသားလူမျိုးစုများအပေါ်တွင် မတရားထိုးစစ်ဆင်ခြင်း၊ ရွာများမီးရှို့ ခြင်း၊ လူသတ်ခြင်း၊ မုဒိန်းကျင့်ခြင်း၊ စသော ရက်စက်ရမ်းကား ယုတ်မာမူများကို နှစ်ပေါင်း(၂၀)နီးပါး ထပ်ခါတလဲလဲ ကျူးလွန်ခဲ့ကြသည်။

ဗိုလ်သန်းရွှေအနေနှင့် စေ့စပ်ရေးဆွေးနွေးရန် တောင်းဆိုချက်များကို ဆင်ခြင်တုံတရားကင်းမဲ့စွာဖြင့် လျစ်လျုရှု၍၊

၁၉၉၀ မေလရွေးကောက်ပွဲ ရလဒ်ကို ပစ်ပယ်၍ ပြည်သူလူထုတရပ်လုံး၏ သဘောဆန္ဒကိုဆန့်ကျင်ပြီး၊ လာမည့် ၂၀၁၀တွင် ရွေးကောက်အသစ်ထပ်မံပြုလုပ်ရန် ကိုယ်တိုင်ထုတ်ဖေါ် ပြောကြားချက်များကိုလည်း ကျွန်ုပ်တို့ မြန်မာပြည်လွတ်မြောက်ရေးအဖွဲ့ချုပ်နှင့် ကန့်ကွက်ကြောင်းဖေါ်ပြအပ်ပါသည်။ ကျွန်ုပ်တို့အနေဖြင့် ယနေ့စုပေါင်း ပြုလုပ်သည့် နအဖစစ်အုပ်စုအား ဆန့်ကျင်ရှုံ့ချ ဆန္ဒပြပွဲများမှတဆင့် စစ်အာဏာရှင်စနစ် မြန်မာ့မြေပေါ်မှ လုံးဝ ပျောက်ကွယ်သွားစေမည့် အဆုံးအဖြတ်တိုက်ပွဲ (၀ါ) စစ်ဗိုလ်ချုပ်များအတွက် သေမင်းတမန် စိန်ခေါ်တိုက်ပွဲ ကိုလည်း မြန်မာနိုင်ငံတဝှမ်းတွင် နအဖ ၂၀၁၀ ရွေးကောက်ပွဲ မတိုင်မှီ အကောင်အထည်ဖော် တိုက်ပွဲဝင်သွားနိုင်ရန် တစိုက်မတ်မတ် ကြိုးပမ်းသွားမည်ဖြစ်သည်။

သို့ဖြစ်ရာ နအဖ စစ်အာဏာရှင်စနစ်ကို မြန်မာ့မြေပေါ်မှ အပြီးအပိုင် သုတ်သင်ဖယ်ရှားနိုင်ရန် ပြည်သူတရပ်လုံးက ပူးပေါင်းပါဝင်လာရေးမူ အပေါ်တွင် အခြေခံသည့် လိုအပ်သောလုပ်ငန်းစဉ်များအားလုံးကို စနစ်တကျ ချမှတ်လုပ်ဆောင် သွားကြမည်ဖြစ်သည်။ သမိုင်း၏ တောင်းဆိုချက်ဖြစ်သော မြန်မာ့မျိုးဆက်သစ်များ အခြေခံလူ့အခွင့်အရေး အပြည့်အ၀ခံစားခွင့် ရရှိစေရေး၊ တိုင်းရင်းသားပြည်သူများအားလုံး တရားဥပေဒေနှင့် အကာအကွယ် ရရှိစေရေး စသည့် ရည်မှန်းချက်များကို ရှေးရှူ၍ အောင်ပွဲရသည်အထိ တိုက်ပွဲဝင်သွားရန် ကျွန်ုပ်တို့အားလုံး စုပေါင်းဆောင်ရွက် သွားမည်ဖြစ်ကြောင်း ကြေငြာအပ်ပါသည်။

ကမ္ဘာ့ကုလသမဂ္ဂ၊ အာဆီယံ၊ အမေရိကန်ပြည်ထောင်စု၊ ဗြိတိန်၊ ဂျပန်နိုင်ငံ အပါအဝင် ကမ္ဘာ့နိုင်ငံအသီးသီးနှင့်

နိုင်ငံတကာအဖွဲ့အစည်းများမှလည်း၊ မြန်မာပြည်သားများ လွတ်လပ်မှု၊ တရားမျှတမှုနှင့် လူ့အခွင့်အရေးများ ခံစားခွင့်ရရှိပြီး၊ မြန်မာနိုင်ငံတွင် ဒီမိုကရေစီစနစ် ထွန်းကားသည်အထိ နအဖ စစ်အာဏာရှင်တို့အပေါ်တွင် ထိရောက်သည့် အရေးယူမူများအား ဆက်လက်လုပ်ဆောင်ပေးကြပါရန် အလေးအနက်တောင်းဆိုအပ်ပါသည်။

တရားမဝင် စစ်အုပ်စုဖယ်ရှားရေး ---- (ဒို့အရေး၊ ဒို့ အရေး)

ဖမ်းဆီးခံ နိုင်ငံရေးအကျဉ်းသားများ လွတ်မြောက်ရေး --- (ဒို့အရေး၊ ဒို့အရေး)

တရားဈင်ပြည်သူ့ အစိုးရ ပေါ်ပါက်ရေး ---- (ဒို့အရေး၊ ဒို့အရေး)

အဖိနှိပ်ခံပြည်သူလူထု လွတ်မြောက်ရေး အရေးတော်ပုံ (အောင်ရမည်၊ အောင်ရမည်)

ဆေးရုံသို့ တစ်ခေါက် လှေလုပ်သားတစ်ယောက်

2008-11-02T02:21:00.009+07:00

ကိုယ့်ဖါသာကိုယ် တာဝန်မကျေဘူးရယ်လို့ရင်ထဲမှာဖြစ်ပေါ်ခံစားလာရတယ်။ အဲလိုခံစားလာရတိုင်းအိပ်မပျော် ဖြစ်ရတဲ့ ညတွေမှာ ဒီတစ်ညလည်း ထပ်တိုးရပါတယ်။ နေ့စဉ်မှတ်တမ်းလည်း ထရေးမိပါတယ်။ ဧပြီလလောက် ကတည်းက ရွာလိုက်တဲ့မိုးက အောက်တိုဘာလလည် လောက်ထိကို မပြတ်သေး။ ရွှေ့ ပြောင်းမြန်မာအလုပ် သမားများကြားမှာ ငွေအရများတဲ့ ရာဘာခြံအလုပ်သမားများတောင် မိုးကြောင့် လုပ်ရက်နည်း၊ ရာဘာဈေးထိုး ကျနဲ့ သိပ်အစဉ်မပြေချင်တော့။ ၀င်ငွေနည်းတဲ့ အခြားအလုပ်သမားများ အတွက်တော့ ပြောဖွယ်မရှိ။ စားဖို့တောင် သိပ်အစဉ်မပြေချင်တော့ ကျန်းမာရေးပြဿနာ ဖြေရှင်းဖို့က နည်းနည်း အလှမ်းဝေး လို့ နေပါသေးတယ်။ ဒီနေ့လည်း ဒုက္ခရောက်နေတဲ့ လူနာတစ်ဦးကို ကိုယ်တတ်နိုင်တဲ့ ဘက်ကနေ ကြိုးစား ကူညီပေးဖို့ ဆေးရုံကို သွားခဲ့ပါတယ်။ တစ်ခုသော လူနာကုတင်မှာ လက်၊ နဖူးနဲ့ နောက်ကျောတွေ မှာ ဓါးဒဏ်ရာနဲ့ လူနာတစ်ဦးကိုပါ ထပ်တွေ့ခဲ့ပါတယ်။ မေ့ဆေးအရှိန်မပြေသေးပါဘူး။ လှေလုပ်သားတစ်ဦးဖြစ်ပြီး မနေ့ကမှ လှေကမ်းကပ်ခဲ့တာပါ။ လှေပေါ်ကအဆင်းမြေပြင်အရောက်မှာပဲ ထိုင်းလူမျိုးသုံးဦးကနေ ဓါးနဲ့ ၀ိုင်းခုတ်ခြင်းကို ခံခဲ့ရပါတယ်။ ဘယ်သူတွေလည်း ဘာအကြောင်းကြောင့်လည်း သိအောင်မကြိုးစားနိုင်ခင် ရထားတဲ့ ဒဏ်ရာတွေကို ကုသဖို့အတွက် နီးစပ်ရာ ခူရဘူရီဆေးရုံကို တတ်ရောက်ခဲ့ရပါတယ်။ နောက်တော့ အရိုးထိအောင် နက်လှတဲ့လက်ကဒဏ်ရာကြောင့် တကောပါဆေးရုံကြီးကို လွဲပြောင်းကုသခဲ့ရပါတယ်။ လူနာစောင့်မရှိ မေ့ဆေးအရှိန်နဲ့ အိပ်မွေ့နေတဲ့အတွက် အနားယူအိပ်စက်နိုင်အောင် ထပြန်လာခဲ့ပါတယ်။ ရင်ထဲမှာ မကောင်းမြန်မာလူမျိုးအားလုံးကို သိအောင်ပြောပြချင်ပါတယ်။ အခုလိုဖြစ်ရပ်တွေဟာ အခုလည်း ဖြစ်ခဲ့ပါတယ် အရင်ကလည်း ဖြစ်ခဲ့ပါတယ် နောင်လည်းဖြစ်နေအုံးမှာပါ။ လှေလုပ်သား အများစုကရေထဲမှာ အချိန်ပြည့်နေသူတွေဆိုတော့ အများစုက အလုပ် လုပ်ကိုင်ခွင့်လက်မှတ်တွေ မရှိပါဘူး။ ဒီအတွက်လည်း ရဲတိုင်ဖို့တို့ လျော်ကြေးတောင်းဖို့ ဆိုတာတွေ မလုပ်နိုင်ပါဘူး။ မတရားအပြုခံသူတွေရယ်လို့ သတ်မှတ်ပြီး စာနာထောက်ထားမှုကို ဆေးရုံဆေးဝန်ထမ်းအများစုဆီကနေ မရခဲ့ပါဘူး။ ငွေပေးနိုင်မှ ဆေးပေးတာပါ။ မပေးနိုင်လို့ ရှိရင် ရဲတိုင်မယ် ဖမ်းခိုင်းမယ်ဆိုတာ ကလည်း လက်သုံးစကားပါ။ (တကယ်လည်း ဖမ်းခိုင်းပါတယ်) ကိုယ့်မြန်မာတွေ အဲလိုခံစားနေရတဲ့ ဝေဒနာတွေကိုလည်း အပြည့်အ၀မကူပေးနိုင်ပါဘူး။

(16.10.08 ရက် နေ့စဉ်မှတ်တမ်းကို ဖော်ပြခြင်းဖြစ်ပါတယ်။ လူအချင်းချင်း နှိပ်စက်ခြင်း ကင်းဝေးကြပါစေ။)

သစ်စက်လုပ်သားများဘ၀

2008-10-26T12:10:00.015+07:00

ထိုင်းနိုင်ငံတောင်ပိုင်းမှာ ရာဘာခြံလုပ်ငန်းကို ထိုင်းလူမျိုးတွေက ကျယ်ကျယ်ပြန့်ပြန့် လုပ်ကိုင်ပါတယ်။ အလုပ်သမားအများစုက ရွှေ့ ပြောင်းမြန်မာအလုပ်သမားတွေပါ။ ရာဘာခြံလုပ်ငန်းနဲ့ ဆက်စပ်လို့ သစ်စက် လုပ်ငန်း လည်းရှိပါတယ်။ အပင်တွေအိုပြီးအစေးထွက်နှုန်းနည်းလာရင် ရာဘာခြံပိုင်ရှင်တွေဟာ သစ်စက်တွေကို ပုတ်ဖြတ် ရောင်းချလိုက်ပါတယ်။ ရောင်းချလိုက်တဲ့ သစ်ကွက်တွေမှာ မြန်မာအလုပ်သမား တွေဟာ စက်ယန္တရားတွေ၊ ဆင်တွေနဲ့အပြိုင်ရာဘာအပင်အိုတွေကိုို ဖြိုလှဲပြီးသစ်စက်ကို ရောက်အောင်ပို့ဆောင် ရပါတယ်။ တစ်ချို့  သစ်ကွက် တွေဟာလူသူနဲ့ အလှမ်းဝေးလှတဲ့အတွက် မြန်မာအလုပ်သမားများလုပ်ငန်းခွင် အန္တရာယ်များ အပြင်အခြားမမျော်လင့်တဲ့ အန္တရာယ်များနဲ့ ကြုံတွေ့ခဲ့ကြရပါတယ်။

မြန်မာတို့ရဲ့ နှစ်သစ်ကူးကာလ ၂၀၀၈ ခုနစ် (ရ) ရက်နေ့ ည(၁၁)၀န်းကျင်မှာ... သေနတ်သံကြားတဲ့ကိုညို ရဲ့ တဲဘက်ကိုဘ၀တူလုပ်သားတွေစုပြီး အပြေးသွားကြပါတယ်။ ရက်နှစ်ဆယ်ခန့်သာ ရှိသေးတဲ့ သမီးလေးကို ရင်ခွင်ထဲမှာ ပိုက်လျှက် ပြေးထွက်လာတဲ့ ကိုညိုရဲ့ ဇနီးဖြစ်သူ မရီ ကိုလမ်းခုလတ်မှာ တွေ့ရပါတယ်။ ကိုညို ကတော့တဲအပေါ်မှာမှောက်လှက်အနေအထားနဲ့သွေးအိုင်ထဲမှာသတိမေ့နေတာတွေ့ရပါတယ်။

သူတို့ကြုံတွေ့ခဲ့ရတာ တွေကို မရီ ပြန်ပြောပြတာက မျက်နှာဖုံးစွပ်နဲ့ လူလေးယောက် တဲပေါ်ကို တက်လာ ပါတယ်။ သေနတ် ကိုယ်စီနဲ့ လူနှစ်ယောက်ရယ် ကျန်နှစ်ယောက်က ဓါးကိုယ်စီကိုင်ထားပါတယ်။ ရှိသမျှပစ္စည်းနဲ့ ပိုက်ဆံကို ထုတ်ပေး ဖို့တောင်းပါတယ်။ ကျွန်မယောကျာင်္းက ပိုက်ဆံမရှိဘူး လို့ပြောပါတယ်။ စက်ပစ္စည်းတွေ တော့သူဌေးဟာတွေမို့လို့မပေးရဲဘူးလို့ ပြောပါတယ်။ ဓားပြထဲကတစ်ယောက်က ကလေးကိုပွေ့ထားတဲ့ ကျွန်မကို မှောက်လျှက်ဖြစ်သွားအောင်ကျောကို ကန်ပြီးနင်းထားပါတယ်။ အောက်ကပိနေတဲ့ ကလေးက ငိုပါတယ်။ ကျွန်မ ယောင်္ကျားက၀င်လုံးပါတယ်။ နားထဲမှာ ဆူညံ့တွေကြားရတယ်။ နောက်တော့ သေနတ်သံနဲ့အတူ ကျွန်မယောင်္ကျား အော်သံကြားရတယ်။ ကျွန်မကို ခြေထောက်နဲ့ ဖိထားတာလျော့သွားတော့ ကျွန်မလည်း ထွက်ပြေးလာတာပါလို့ပြန်ပြောပြပါတယ်။
ဝမ်းဗိုက်နဲ့ ညာဘက်ပေါင်မှာ သွေးထွက်နေတဲ့ ကိုညိုကို ဖန်ငဆေးရုံကြီးကို အခက်အခဲပေါင်းများစွာနဲ့ ညတွင်းခြင်း ပို့ဆောင်ပေးခဲ့ရပါတယ်။ နောက်တော့ တကောပါ ဆေးရုံကြီးကိုထပ်မံလွဲပြောင်းကုသခဲ့ရပါတယ်။ ကိုညိုကိုစတွေ့ကတည်းကနေ အခုချိန်ထိသတိမရသေးဘူးလို့လည်း ညီဖြစ်သူ ဇော်မင်းကပြောပြပါတယ်။ တကောပါ ဆေးရုံကြီးရဲ့ စစ်ဆေးချက်အရ ၀မ်းဗိုက်အသဲအောက်ဘက်နားမှာ သေနတ်ဒဏ်ရာနဲ့ ညာဘက်ပေါင် မှာဓားဒဏ်ရာတို့ ရရှိတယ်လို့ဆိုပါတယ်။ ဆေးရုံမှာ သေလုမျောပါးဒဏ်ရာတွေ နဲ့သတိမေ့နေတဲ့ကိုညို ပြန်လည် ကျန်းမာလာဖို့ကိုသာ မိသားစုအနေနဲ့ဆုတောင်းနေကြပါတယ်။ တရားမ၀င်ရွှေ့ ပြောင်းအလုပ်သမား တစ်ဦး အနေနဲ့ တရားဥပဒေဆိုတာ သိပ်ပြီးအကာအကွယ်နဲ့ အရေးယူပေးနိုင်မှုမရှိပါဘူး။
မြန်မာရွှေ့ ပြောင်းအလုပ်သမားတွေ ရဲ့ဘ၀ဟာ ခက်ခဲကြမ်းတမ်းလှပါတယ်။ ဒါပေမယ့် နယ်စပ်ဒေသကို ဖြတ်ကျော်ဝင်ရောက်လာတဲ့ မြန်မာအလုပ်သမားဦးရေဟာ တစ်နေ့ထက်တစ်နေ့ ပိုမိုတိုးတက်လို့သာလာ နေပါတယ်။

အမြဲပျော်ရွှင် နိုင်ပါစေ

2008-10-09T05:03:00.005+07:00

ကျွန်မ၏ အကြောင်း

ကျွန်မ၏ အမည်သည် မလှိုင်းအိအိ ဖြစ်ပါသည်။ ကျွန်မ၏ အသက်သည် (၁၃) နှစ်ရှိပါသည်။ ကျွန်မမှာ မောင်လေး တစ်ယောက်ရှိပါသည်။ မောင်လေး၏ အမည်သည် ဝေလုကျော်ဖြစ်ပါသည်။ ကျွန်မမိဘများမှာ ဦးစန်းထွေးနှင့် ဒေါ်ဌေးခိုင်တို့ ဖြစ်ပါသည်။ ဖခင်၏အသက်မှာ (၃၅) နှစ်ဖြစ်ပြီး မိခင်မှာ အသက် (၃၄) နှစ်ဖြစ် သည်။ ကျွန်မတို့ မိသားစုသည် အလွန်ဆင်းရဲပြီး ရာဘာတုံးကိုပဲ ထမ်းနေရပါသည်။ ကျွန်မတို့ သည် မြန်မာနိုင်ငံ မှာ အရမ်းဆင်းရဲလွန်းပြီး ထိုင်းနိုင်ငံသို့ လာရောက် အလုပ်လုပ်ကိုင်ရခြင်းဖြစ်သည်။ ကျွန်မ အဖေသည် တစ်နေ့ ၂၀၀ ဘတ်ဖြင့် အလုပ်လုပ်ရသည်။ ကျွန်မတို့ သစ်စက်မှာ နေရတာအလွန်ပျော်စရာ ကောင်းလှပါသည်။ ဒါပေမယ့် ကျွန်မတို့သည် တစ်ဘက်မှာ အလွန်ဆင်းရဲရှာပြီး မပျော်လည်းပဲပျော်အောင်ကြိုးစားပြီး နေကြရသည်။ ကျွန်မမောင်လေးသည် ဘန်နယားကျောင်းတွင် ပညာသင်ယူနေပါသည်။ ဒါပေမယ့် ကျွန်မတို့ မောင်လေးကို တစ်နေ့မှာ မုန့်ဖိုး (၁၀) ဘတ်မျှသာ ပေးနိုင်သည်။ ကျွန်မမောင်လေး ထိုင်းကျောင်းမှ ပြန်လာတိုင်း သူ့ကို ရေချိုး ပေးရသည်။ ကျွန်မအဖေ အလုပ်မှပြန်လာချိန်တိုင်းလည်း ထမင်းခပ်ပေးရသည်။ အမေဟင်းချက်သည့် အချိန်၌ လည်းဝိုင်းကူပေးရသည်။ ကျွန်မသည် ကျောင်းနေရသော်လည်း မိသားစု စားဝတ်နေရေး အဆင်မပြေသည့် အတွက်ဝမ်းနည်းမိကြောင်းသူငယ်ချင်းအပေါင်းတို့အားအသိပေးလိုပါသည်။သူငယ်ချင်းအပေါင်းတို့ အမြဲပျော်ရွှင် နိုင်ကြပါစေလို့ ဆုမွန်ကောင်း တောင်းပေးလိုက်ပါသည်။

လှိုင်းအိအိ
ပါဝိကျောင်း

သေနတ်ဖြင့် ပစ်ခတ်ဖမ်းဆီးခြင်းဖြစ်ပွား

2008-09-16T02:08:00.005+07:00

ထိုင်းနိုင်ငံတောင်ပိုင်း ဖန်ငခရိုင်၊ ခီးခတ်ကျေးရွာတွင် တရားမ၀င် ၀င်ရောက်လာသော မြန်မာတဦးအား ရဲများမှ ဖမ်းဆီးရန် ကျိုးပမ်းစဉ် အဖမ်းမခံပဲထွက်ပြေးသဖြင့် သေနတ်ဖြင့် ပစ်ခတ်ဖမ်းဆီးခြင်းဖြစ်သည်။

လူပွဲစားဟု ထင်ရသော မြန်မာအလုပ်သမား မိသားစုများ နေထိုင်သော တန်းလျားတခုကို ဒေသခံ ရဲများမှ ယမန် နေ့ မနက် ၁၀ နာရီ ၀န်းကျင်ခန့်တွင် ၀ိုင်းဝန်းဖမ်းဆီးစဉ် ထွက်ပြေးသဖြင့် ပစ်ခတ် ဖမ်းဆီးခြင်း ဖြစ်သည်။

တစ်ခန်းကျော်တွင် ရှိနေသော မြန်မာမိသားစုတစု မှလည်း "ကျွန်မတို့ တော်တော်လန့်သွားတယ်၊ စကား ပြောစက် ကိုင်ထားတဲ့ ရဲကပစ်လို့ပြောတာနဲ့ မီတာ ၅၀ ခန့်အကွာအဝေး ရောက်နေတဲ့ လူကိုလှမ်းပစ်တာ ဟု ပြောပြပါတယ်။ အိမ်မှာ ရှိနေတဲ့ အသက် ၄၅ နှစ်ခန့် အမျိုးသမီးကြီးတစ်ဦးနဲ့ အသက် ၂၀နှစ်ဆယ် အရွယ် အမျိုးသမီးငယ်တဦးတို့ကို ဖမ်းဆောင်သွားတယ်လို့ ဆက်လက်ပြောပြပါတယ်။"

ထိုင်းအမျိုးသမီးတစ်ဦးမှလည်း "သူအိပ်ပျော်နေတုန်း သေနတ်သံကြားတော့လန့်နိုးသွားတယ်။ ဘေးနားကရှိတဲ့ လူတွေကပါ ၀ိုင်းဖမ်းနေတော့ မကြည့်ခြင်တာနဲ့ဖမ်းမိလား မမိလားမသိတော့ ဘူးလို့ဆက် ပြောပြပါတယ်။"

ဆေးရုံကို ဖုန်းဆက်သွယ်မေးကြည့်တော့ "သေနတ်ဒဏ်ရာနဲ့ လူနာတော့မရောက်သေးဘူးလို့ ပြန်ဖြေကြား ပါတယ်။"

ထိုင်းနိုင်ငံတောင်ပိုင်းမှာ ယခုလိုပစ်ခတ်ဖမ်းဆီးမှုတွေ မကြာခဏဆိုသလို တွေ့ရလေ့ရှိပါတယ်။
မြန်မာနိုင်ငံသား သုံးဦးရေနစ်သေဆုံး

မြန်မာမိသားစုတစ်စု ရက်ရက်စက်စက် အသတ်ခံရ

2008-08-17T22:49:00.003+07:00

၁၄၊၈၊၂၀၀၈ ရက်နေ့ မနက် ၁၀ နာရီ ၃၀ မိနစ်အချိန် လုပ်ဘူရီ ခရိုင်၊ ခုပ်ဆလွန် ရဲစခန်းသို့ တာဝန်သိ ထိုင်းပြည်သူ တဦး သတင်းပေးတိုင်ကြားချက်အရ ခုပ်ဆလွန်ရဲစခန်းမှ တာဝန်ခံရဲအရာရှိ ရဲအုပ် အာရွန်နစ်ပစုတ်မှ အခင်းဖြစ်ပွားရာ နေရာသို့ သွားရောက် စစ်ဆေးရာ မီးသွေးဖုတ်သည့် မီးသွေးဖိုအနီး ရေမြောင်းနဘေးတွင် သေနတ်ဒဏ်ရာများ နှင့်သေဆုံးနေသော အလောင်း ၃ လောင်းအား တွေ့ရှိခဲ့သည်။ ပထမတွေ့ရှိရသော အလောင်းမှာ အမျိုးသမီး အလောင်းဖြစ်ပြီး အသက်မှာ သုံးဆယ်ဝန်းကျင်ခန့်ရှိသည်၊ ဓားဖြင့်ခုတ်ဖြတ်ထားသော ဒဏ်ရာကြောင့် လည်ပင်းမှာ ပြတ်လုနီးပါးဖြစ်နေသည်ကို ရဲများကစစ်ဆေး တွေ့ရှိခဲ့ပြီး ပထမအလောင်းနှင့် ကိုက် ၁၅၀ အကွာတွင် သေနတ်ဒဏ်ရာနှင့် သေဆုံးနေသော အသက်သုံးဆယ် ၀န်းကျင် အမျိုးသားတစ်ဦး နှင့် အသက် ငါး နှစ်အရွယ် ကလေးငယ် တစ်ဦးကိုပါတွေ့ရှိခဲ့သည်။ သေဆုံးသူများမှာ ထိုင်းနိုင်ငံတွင် အလုပ်လာရောက် လုပ်ကိုင်လျှက်ရှိသော ရွှေ့  ပြောင်း မြန်မာအလုပ်သမား မိသားစု ဖြစ်ပြီး လူသတ်သမားများက အခြားတနေရာမှ ထိုမိသားစုအား ဖမ်းဆီးခေါ်ဆောင်လာပြီး၊ ယခုလို ရက်ရက်စက်စက် သတ်ပစ်လိုက်ခြင်းဖြစ်ကြောင်း အခင်းဖြစ်ပွားရာ နေရာနှင့် ကိုက် (၅၀၀) အကွာ ရေကန် နဘေးတွင် ငါးထိုင်မျှား နေသော ထိုင်းအမျိုးသားတစ်ဦးက "ကယ်ကြပါ.... ကယ်ကြပါ...." လို့အကူအညီအော်တောင်းတဲ့ အသံကို ကျွန်တော်ကြားရတယ်။ ညကလည်းမှောင်နေတော့ ဘာမှလည်း မမြင်ရဘူး။ ကျနော်တစ်ယောက်တည်း ဆိုတော့သွားလည်းမသွားရဲဘူး၊ နောက်သေနတ်သံ နှစ်ချက်ကြားရတယ်။ မိနစ်သုံးဆယ် အကြာသေနတ်သံ ကြားရတဲ့ နေရာကို ကျွန်တော် သွားကြည့်တော့ ကျနော် ကလေးအလောင်းကို အရင်စတွေ့တာ တွေ့တွေ့ခြင်းပဲ ကျနော် ရဲစခန်းကို အကြောင်းကြားတာပဲ ဟုရဲများ ၏စစ်ဆေးမေးမြန်းချက်ကို ၄င်းအမျိုးသားက ဖြေကြားသွား သည်။ အလောင်းတွေ့ရှိရာ နေရာအနီးတ၀ိုက်တွင် ကြက်မွေးမြူရေးနှင့် ၀က်မွေးမြူရေး ခြံများကိုတွေ့ရှိရပြီး သေဆုံးသူ မြန်မာမိသားစုမှာ မွေးမြူရေးခြံတစ်ခြံမှ အလုပ်သမားများ ဖြစ်နိုင်ကြောင်း ရဲများမှ ခန့်မှန်းသည်။

စာသင်ကျောင်း နှစ်ကျောင်း၊ လူ့အခွင့်အရေး သင်တန်းနဲ့ ကျွန်တော်

2008-07-29T02:33:00.006+07:00

လုပ်ငန်းစဉ် နှစ်ရပ်ကို ပူးတွဲအကောင်အထည်ဖော်ဖို့အတွက် ၂၈ ရက်နေ့ ခူရဘူရီခရီးစဉ်ကိုမနက် ၈နာရီမှာ စတင် တယ်။ ဖုန်းကြီးကျောင်းတစ်ကျောင်းမှာ ၀ါဆိုနေတဲ့ ဘုန်းကြီးကိုဝင်ပင့်တယ်။ Grassroots - HRE နဲ့ MMT's ကဖွင့်ထားတဲ့ကျောင်းနှစ်ကျောင်းစလုံးကိုဘုန်းကြီးနဲ့တစ်လှည့်စီဝင်ရမှာပါ။ ဘုန်းကြီးကတော့ မြန်မာ ရွှေ့ ပြောင်းအလုပ်သမားများရဲ့သား၊သမီးကလေးငယ်များကို ယဉ်ကျေးမှု သင်တန်းတွေပေးမှာပါ။ ကျေးဇူးကြီး မားလှပါတယ်။ အချို့ ကလေးငယ်များဟာ ထိုင်းနိုင်ငံမှာတင် မွေးဖွားကြီးပြင်းလာကြရတဲ့ ကလေးတွေပါ။ မြန်မာနိုင်ငံနဲ့မြန်မာ့ယဉ်ကျေးမှုဆိုတာကလေးတွေအတွက်အသစ်အစမ်းတွေပါ။ကျွန်တော်ကတော့ကလေးများ ရဲ့ ကျမ်းမာရေးစစ်ဆေးပေးမှုများ ကိုဆောင်ရွက်ပေးမှာပါ။ ပုံမှန်အစီအစဉ်ထဲကိုအသစ်ထပ်ဝင် လာတာက ဘန်ကလန်း မှာဘုန်းကြီးက ၀ါဆိုသင်္ဃန်းကပ်လှုပူဇော်ခြင်းကို ခံရမယ့် အစီအစဉ်ပါ။ ကျောင်းသား အဖြစ်နဲ့ ဓါတ်ပုံမှတ်တမ်းတင်ပေးဖြစ်ပါတယ်။
ဘန်ကလန်းရဲ့ သဘာဝရှုခင်းတွေကိုလည်း ရိုက်လာဖြစ်ပါတယ်။ ၀ါဆိုသင်္ဃန်းကပ်နေတဲ့ မြင်ကွင်းက ရင်ကို ကြည်နှုးစေပါတယ်။ တို့လူမျိုးတွေ ဘယ်ကိုရောက်ရောက် ဘုရား၊ တရား၊ သံဃာ မမေ့တာ။ အလှူ ရေစက် လက်နဲ့မကွာတာ တွေအတွက် သာဓုခေါ်ဆိုရင်း မျက်ရည်ဝဲမိပါတယ်။ ပေးဆပ်လိုက်ရတဲ့ အချိန်တွေထက်ကို ပီတိပိုရရှိခဲ့ပါတယ်။ ဦးဇင်းဆွမ်း ဘုန်းပေးပြီးနောက်မှာ MMT's စာသင်ကျောင်းလေးကို ဆက်ထွက်ခဲ့ပါတယ်။ စာသင်ကျောင်းလေးမှာ ကလေးတွေ ထမင်းတောင်စား နေကြပြီ။ ကလေးတွေ ကိုကစားချိန် နာရီဝက် လောက်ပေးအပြီးမှာ ကျန်းမာရေး စစ်ဆေးပေးမှုကိုစတင်ပါတယ်။ ကလေး ၁၇ ယောက်ကို ကျန်းမာရေး စစ်ဆေးပေးမှုကို ပြုလုပ်ပေးခဲ့ပါတယ်။ နေ့လည် ၁နာရီ ၄၅ မိနစ်မှာ MMT's ကျောင်းမှ ထွက်ခွါလာပြီး Grassroots - HRE ကျောင်းမှာ ကလေး ၁၀ ယောက်ကို ကျန်းမာရေး စစ်ဆေးပေးပြီးချိန်မှာ ၃ နာရီထိုးပြီး ကျောင်းဆင်းချိန် ရောက်ပါတယ်။
ခူရဘူရီမှ ရုံးကို ပြန်ရောက်ချိန်မှာ ညနေ ၅ နာရီထိုးနေပါပြီ။ ၆ နာရီ ၃၀ မိနစ်မှာ စတင်မယ့်။ အခြေခံ လူ့အခွင့်အရေး သင်တန်းအတွက် ကြိုတင်ပြင်ဆင်ရပါတယ်။ ည ၈နာရီ ၀န်းကျင်မှာ ပဲသင်တန်း အောင်မြင်စွာ ပြီးဆုံးရင်း တစ်နေ့တာ လုပ်ငန်းစဉ်ရပ်နားခဲ့ပါတယ်။ (ကျွန်တော် ပေးတဲ့ လူ့အခွင့်ရေး သင်တန်းများကိုလည်း စောင့်မျှော်ဖတ်ပေးကြပါခင်ဗျာ။)

မွေးနေ့ တစ်ခုကို ဖြတ်သန်းခြင်း

2008-07-27T20:16:00.010+07:00

ညနက်ပိုင်း မှအိပ်တတ်တဲ့ အလေ့အထကြောင့် မနက်ပိုင်းမှာ စောစောထလေ့မရှိ။ ရုံးပိတ်ရက်ဖြစ်တာ ကြောင့်နေ့လည် (၁၁)နာရီကျော်မှ အိပ်ယာထဖြစ်တယ်။ ဒီလိုနဲ့ပဲ (၂၆) ရက်နေ့မှာကြရောက်တဲ့ ကျွန်တော့်ရဲ့ မွေးနေ့ကို စတင်တယ်။ သူငယ်ချင်းတစ်ယောက်အခန်းရှေ့ က ဖြတ်သွားတာ တွေ့လို့ လိုက်သွား တာဟိုရောက်တော့ အရက်ဝိုင်းနဲ့သွားတိုးနေတယ်။ အမြည်းကတော့ ငါးစဉ်းကော။ အခန်းမှာ ရှိတဲ့စပိုင် ၃ ပုလင်း ပြန်ယူပြီးသောက်လိုက်တာ စံချိန်ချိုးသွားတယ်။ တစ်ခါမှ နေ့ခင်းကြောင် တောင် မမူးဖူးဘူး။ ထုံးစံအတိုင်းပေါ့ မူးနေတော့ နောက်ကြောင်းပဲ စားမြုံ့ပြန်ဖြစ်တယ်။ ဖြတ်သန်းခဲ့ရတဲ့ ဘ၀အစိတ်အပိုင်း တစ်ချို့ က သူငယ်ချင်းတွေ ကိုသတိရမိတယ်။ သီချင်းတွေ အော်ဆိုဖြစ်တယ် ဂီတာကျိုးပြတ်သွားတော့မှ သီချင်းဆိုရပ် တယ်။

၈၈၈၈ (ရှစ်လေးလုံး)နေ့အခန်းအနားကျင်းပဖို့ ပမာဏဆွေးနွေးရာကနေ ၈၈၈၈ လေးလုံးမတိုင်မှီမွန်၊ကရင် အရေးအခင်း၊KNU အကွဲအပြဲ၊ မွန်ပြည်သစ်ပါတီရဲ့ ခိုင်မာတဲ့ ရပ်တည်ချက်၊KNPP ရဲ့ခိုင်မာတဲ့ရပ်တည်ချက်၊ KIA ရဲ့ပျော့ညံ့တဲ့ ရပ်တည်ချက် အကုန်စုံသွားတာပဲ။ ဘယ်လိုစကားပြတ်သွားမှန်းတောင်မသိဘူး မူးမူးနဲ့ ပြန် လာပြီးအိပ်ပျော်သွားတာ ည ၈ နာရီခွဲလောက်မှ ပြန်နှိုးလာတယ်။ ကျွန်တော့်ရဲ့ မွေးနေ့ဟာ Happy Birthday လို့နှုတ်ဆက်သူ တစ်ယောက်တည်းနဲ့ ပွဲသိမ်းသွားတယ်။